Trumpi në rrezik financiar e politik shkaku i padisë së mundshme penale

Ish-presidenti amerikan, Donald Trump, mund të përballet me një goditje të rëndë financiare dhe politike, pasi që prokurorët shtetërorë po e shqyrtojnë ngritjen e një padie penale ndaj biznesit të tij familjar.

Prokurorët në New York mund së shpejti të ngrenë padi kundër Organizatës Trump, lidhur me taksat në mallrat e luksit që u ka ofruar punonjësve kryesorë, duke përfshirë përdorimin e apartamenteve, veturave dhe bursat për shkollim. Presidenti i 45-të amerikan nuk do të përballet me padi, porse drama ligjore mund ta falimentojë kompaninë e tij, duke ia dëmtuar raportet me bankat dhe partnerët, si dhe do ta mjegullojë përpjekjen e tij për rikthim në politikë.