Plani i kryeministrit britanik Boris Johnson për të hequr pothuajse të gjitha kufizimet pandemike të Anglisë të hënën është një kërcënim për botën dhe është burim për shfaqjen e varianteve rezistente ndaj vaksinave, thonë ekspertët ndërkombëtarë.
Pozicioni i Britanisë si një qendër transporti global do të nënkuptojë se çdo variant i ri atje do të përhapet me shpejtësi në të gjithë botën, paralajmëruan shkencëtarët dhe mjekët në një samit emergjence.
Këshilltarët qeveritarë në Zelandën e Re, Izrael dhe Itali ishin midis atyre që i ranë kambanave të alarmit për politikën, ndërsa më shumë se 1200 shkencëtarë mbështetën një letër drejtuar revistës Lancet që paralajmëronte se strategjia e hapjes mund të lejonte përhapjen e varianteve rezistente ndaj vaksinës.
Shqetësimet e shprehura në vendet e tjera vijnë pasi profesori Chris Whitty, zyrtari kryesor mjekësor për Anglinë, paralajmëroi të enjten se numri i njerëzve në spital me COVID-19 mund të arrijë nivele "mjaft të frikshme" brenda javësh, pasi rastet u rritën për shkak të variantit ngjitës Delta dhe heqjes së kufizimeve të bllokimit.
Whitty ka thënë në një uebinar se pranimet në spital po dyfishoheshin çdo tre javë dhe se numri aktual mund të rritet në nivele serioze në dy muajt e ardhshëm.
Infeksionet e reja të koronavirusit në Britani janë në nivelin më të lartë gjashtëmujor, sipas shifrave të qeverisë, dhe numri i njerëzve në spital dhe që vdesin nga COVID-19 janë në nivelin e tyre më të lartë që nga marsi. Të dhënat e së enjtes treguan 3.786 njerëz që janë shtrirë në spital me COVID-19 dhe 63 vdekje të tjera të lidhura me virusin.
Britania të premten raportoi mbi 50 mijë raste të reja pozitive, shifra më e lartë që nga muaji janar.
© KOHA. Të gjitha të drejtat janë të rezervuara.
