Austriakët po shijojnë një ditë të fundit në kafene dhe në tregjet e Krishtlindjeve këtë të diele, para se qeveria të vendoste një bllokim mbarëkombëtar për të luftuar një valë të katërt në rritje të infeksioneve me koronavirus.
Masat, të cilat hyjnë në fuqi nga e hëna pritet të zgjasin maksimumi 20 ditë, por do të rivlerësohen pas datës 10 dhjetor.
Këto masa kërkojnë që njerëzit të qëndrojnë në shtëpi përveç arsyeve themelore si furnizimi me ushqime, shkuarja te mjeku dhe stërvitja.
Restorantet dhe shumica e dyqaneve do të mbyllen dhe ngjarjet më të mëdha do të anulohen. Shkollat dhe çerdhet do të qëndrojnë të hapura, por prindërit inkurajohen të mbajnë fëmijët e tyre në shtëpi.
Kancelari austriak, Alexander Schallenberg, njoftoi gjithashtu të premten se Austria do të prezantojë një urdhër vaksinimi që nga 1 shkurti i vitit 2022. Detajet se si do të funksionojë urdhri nuk janë ende të qarta.
Në një intervistë të botuar të dielën në gazetën Kurier, Schallenberg ka thënë se është "e trishtueshme" që Qeveria duhej të përdorte urdhërin si formë për të siguruar që njerëzit të vaksinohen.
Pak më pak se 66% e popullsisë 8.9 milionëshe të Austrisë është vaksinuar plotësisht, që është një nga shkallët më të ulëta të vaksinimit në Evropën Perëndimore.
Për bllokimin që do të hyjë në fuqi, Schallenberg ka thënë se ai dhe zyrtarë të tjerë kishin shpresuar këtë verë se kufizime të tilla nuk do të ishin më të nevojshme, dhe se ishte një vendim i vështirë për të vendosur një bllokim të ri edhe për njerëzit e vaksinuar.
"Që liritë e njerëzve duhet të kufizohen përsëri, më besoni, është gjithashtu e vështirë për mua”, është shprehur Schallenberg.
Masat e reja, veçanërisht vaksinimi i obligueshëm, janë ndeshur me kundërshtim të ashpër në disa vende. Një protestë e së shtunës në kryeqytetin e Vjenës tërhoqi 40,000 njerëz, sipas policisë, duke përfshirë anëtarë të partive dhe grupeve të ekstremit të djathtë.
Protesta të ngjashme janë zhvilluar edhe në disa qytete të Holandës ku pati edhe të plagosur si pasojë e përleshjes së protestuesve me forcat policore, e po ashtu në Kroaci.
© KOHA. Të gjitha të drejtat janë të rezervuara.
