Afganet shndërrohen në tregtare për të mbajtur familjen

Kriza ekonomike, varfëria dhe uria, ka detyruar shumë gra afgane që të dalin të shesin gjësendet e tyre nëpër pazare me qëllim që të ushqejnë familjet e veta. Në mesin e qindra grave tregtare është edhe Amina Saifi. Ajo rrëfen se pas kthimit të talebanëve në pushtet, e ka pasur të pamundur të kthehet në vendin e saj të punës në një shkollë të mesme.

Burri i është vrarë në një sulm vetëvrasës para tre vjetësh dhe tani është përgjegjëse për të ushqyer tetë fëmijët e saj. Punën në Pazar e ka filluar së fundmi kur ka nisur të shesë gjësendet e shtëpisë. Dikur udhëheqëse e qindra nxënësve, tani thotë se mezi siguron para të mjaftueshme për të ushqyer fëmijët.