Një autobus që transportonte besimtarë që udhëtonin për në një pelegrinazh të Pashkëve në malin lindor të Zimbabve ra në një grykë, duke lënë të vdekur të paktën 35 persona në orët e para të së premtes, raporton AP.
Autobusi ishte i mbingarkuar me 106 pasagjerë dhe doli nga rruga pranë Chimanimani duke u përplasur në një përroskë të thellë, tha policia.
Përplasja ndodhi pranë distriktit Chipinge të provincës Manicaland lindore të Zimbabvesë, njoftoi transmetuesi shtetëror ZBC.
Autobusi po transportonte anëtarë të Kishës së Krishterë të Sionit, një emërtim lokal i njohur për mbajtjen e pelegrinazheve të rregullta, ku merrnin pjesë mijëra njerëz.
Aksidentet e autobusëve janë të shpeshta në vendin e Afrikës Jugore, ku disa shoferë mbingarkojnë automjetet e tyre dhe kalojnë kufirin e shpejtësisë. Gjendja e keqe e rrugëve të Zimbabvesë është fajësuar gjithashtu për numrin e madh të aksidenteve.
Rrugët e Zimbabvesë janë veçanërisht të ngarkuara gjatë periudhës së Pashkëve, e cila është një festë e madhe në këtë vend kryesisht të krishterë, pasi njerëzit nisin udhëtime të rrezikshme me autobusë dhe kamionë të rrënuar për t'u mbledhur për ditë të tëra.
© KOHA. Të gjitha të drejtat janë të rezervuara.
