Dy motra me shtetësi pakistaneze dhe spanjolle dyshohet se janë vrarë nga bashkëshortet e tyre si dhe xhaxhai e vëllai i vajzave, siç është thënë, “për të mbrojtur nderin”.
Ato janë vrarë një ditë pasi janë mashtruar për të udhëtuar nga Spanja për në Pakistan.
Aneesa Abbas, 24 vjeç dhe Arooj Abbas, 21 vjeç, janë qëlluar për vdekje të premten, pasi kanë mbërritur në qytetin lindor Gujrat, bashkë me nënën e tyre, Azra Bibi, njoftoi “The Guardian” të martën.
Sipas raporteve fillestare, motrave u është bërë presion që t’i ndihmojnë bashkëshortët e tyre, me të cilët i kishin detyruar të martohen një vit më parë.
Dhe Aneesa dhe Arooj janë vrarë pasi kanë refuzuar të ofrojnë këtë ndihmë. Ato dëshironin të shkurorëzoheshin nga bashkëshortët, të cilët ishin edhe kushërinjtë e tyre, në mënyrë që të martoheshin në Spanjë.
“Hulumtimi ka konfirmuar se dy motrat janë vrarë në emër të ‘nderit’”, ka thënë oficeri i policisë, Muhammad Akhtar.
Sipas policisë, bashkëshortët e dy motrave, Hassan Aurengzeb dhe Atiq Hanif, xhaxhai, Hanif Goga dhe vëllai i tyre, Shehryar Abbas janë arrestuar dhe e kanë pranuar vrasjen. Edhe dy burra të tjerë janë arrestuar lidhur me rastin.
Qindra gra vriten nga anëtarë të familjeve në Pakistan çdo vit, në ato që quhen “vrasje nderi”.
Motrat janë vrarë për “shkelje të normave konservatore që rregullojnë marrëdhëniet e grave”, pavarësisht se legjislacioni i vitit 2016 u dha fund boshllëqeve në ligj që i lejonin fajtorët të ecnin të lirë në shoqërinë thellësisht patriarkale të vendit.
Në fillim të atij viti, vrasja e Qandeel Baloch, e njohur si “Kim Kardashian e Pakistanit”, nga vëllai i saj, Waseem Azeem, shkaktoi zemërim kombëtar në Pakistan. Azeemi është dënuar me burgim të përjetshëm, por është liruar në shkurt të këtij viti pasi është falur nga prindërit e tij.
Sipas Komisionit të të Drejtave të Njerëzve në Pakistan, më shumë se 470 raste të “vrasjeve të nderit” janë raportuar vetëm vitin e kaluar.
© KOHA. Të gjitha të drejtat janë të rezervuara.
