Zgjerimi i Bashkimit Evropian me vendet që janë të gatshme dhe të afta për të përmbushur kushtet, nuk është as favor e as lëshim, por është në interesin strategjik të bllokut, thuhet në njoftimin e lëshuar nga Shërbimi Diplomatik i Bashkimit Evropian.
Në këtë njoftim thuhet se zgjerimi i BE-së ka zënë vend lart në agjendë, teksa është pohuar se vëmendja i është rikthyer edhe Ballkanit Perëndimor.
“Javën e kaluar, Këshilli Evropian vendosi që e ardhmja e Ukrainës, Moldavisë dhe Gjeorgjisë qëndron në BE. Vendet e Ballkanit Perëndimor janë tashmë në atë rrugë dhe BE-ja gjithashtu ka ripërsëritur angazhimin e saj ndaj tyre”, thuhet në njoftimin e lëshuar nga shërbimi diplomatik i BE-së.
Sipas njoftimit, vendet e Ballkanit Perëndimor me të drejtë kanë kërkuar që procesi i anëtarësimit të tyre, të gjykohet sipas meritave.
“Kanë kaluar pothuajse 20 vjet që kur BE-ja deklaroi në Selanik se e ardhmja e Ballkanit Perëndimor është brenda BE-së, kështu që një shkallë e caktuar padurimi nga ana e tyre, për të thënë të paktën, është e kuptueshme”.
Më tej thuhet se zgjerimi mbetet një nga mjetet më të suksesshme të politikës së jashtme të BE-së.
Në Samitin e mbajtur në Bruksel më 23 qershor, ku është diskutuar edhe për integrimin e Ballkanit Perëndimor nuk ka pasur ndonjë rezultat konkret.
Gjatë këtij samiti nuk është dhënë ndonjë datë për hapjen e negociatave me Maqedoninë e Veriut dhe Shqipërinë, e po ashtu Kosova nuk ka marrë ndonjë datë për liberalizimin e vizave, e as Bosnjë-Hercegovina nuk ka marrë statusin e kandidatit për anëtar të BE-së.
© KOHA. Të gjitha të drejtat janë të rezervuara.
