Nxehtësia e madhe në pjesën më të madhe të Evropës ka bërë që rekordet e temperaturave të muajit qershor të thyhen, duke nisur nga Rrethi Arktik e deri në Afrikën e Veriut.
Vala e egër e të nxehtit ka bërë që temperaturat të rriten shumë mbi mesataren e qershorit për shumë vende, në disa raste deri në 20 gradë, raportoi BBC-ja të enjten.
Norvegjia regjistroi temperaturë prej 32.5 gradë celsius të mërkurën, që thuhet se është temperatura më e lartë e regjistruar ndonjëherë brenda Rrethit Arktik në Evropë dhe dukshëm më e lartë se mesatarja e qershorit prej 13 gradë celsius.
Polonia pa të hënën që temperaturat të arrijnë ato të mesit të viteve tridhjetë, derisa në disa pjesë të Gjermanisë lindore temperaturat arritën në 37 gradë celsius.
Rekordet e temperaturës të qershorit u thyen gjithashtu në Slloveni e Kroaci, ndërsa Bosnjë-Hercegovina regjistroi temperatura deri në 41 gradë celsius.
Vapa ekstreme është shtrirë edhe në Afrikën e Veriut, ku temperaturat në Tunizi barazuan rekordin mujor prej 48.7 gradë celsius të hënën.
Ndërkohë diku tjetër në Evropë, në Austri, një shpërthim stuhish shkaktoi rrëshqitje shkatërruese balte, duke lënë të vdekur një person dhe duke përmbytur shtëpi e rrugë në rajonin e Carinthias.
Stuhi të tjera priten në fund të javës, me breshër të dëmshëm, rrebeshe dhe erëra të forta.
© KOHA. Të gjitha të drejtat janë të rezervuara.
