Autoritetet austriake kanë vendosur që personat e infektuar me COVID-19, të cilët nuk ndjejnë asnjë simptomë, nuk do të duhet të qëndrojnë më në karantinë, shkruan BBC.
Vendi alpin i dha fund karantinës së detyrueshme për njerëzit që kanë rezultuar pozitivë me virusin, por nuk ndihen të sëmurë. Rregulloret e reja do të zbatohen nga muaji i ardhshëm.
Megjithatë, personat e infektuar duhet të mbajnë maska brenda ose jashtë nëse nuk është e mundur të ruhet një distancë fizike prej të paktën dy metrash. Ata gjithashtu nuk lejohen të hyjnë në vende që u shërbejnë njerëzve veçanërisht të cenueshëm ndaj COVID-19, si spitalet, shtëpitë e të moshuarve ose objektet për personat me aftësi të kufizuara.
Ministri austriak i Shëndetësisë, Johannes Rauch, ka thënë se vendimi është marrë për shkak të ndikimit psikologjik dhe social të pandemisë.
Ai i tha të përditshmes Tiroler Tageszeitung se “duhet të merret parasysh se ne nuk mund të jetojmë për vite me masat rigoroze të shkaktuara nga pandemia e koronavirusit”.
© KOHA. Të gjitha të drejtat janë të rezervuara.
