Qeveria e Afganistanit ka nënshkruar marrëveshje të përkohshme me Rusinë për të importuar produkte të naftës dhe grurit, shkroi të mërkurën Al Jazeera.
Marrëveshja përfshin blerjen vjetore të një milion ton benzinë, një milion ton naftë, gjysmë milioni ton gaz dhe dy milionë tonë grurë.
Zëdhënësi i Ministrisë së Tregtisë dhe Industrisë të Afganistanit, Akhundzada Abdul Salam Jawad, ka thënë se procesi i importit pritet të fillojë shumë shpejt.
Ai tha se kjo marrëveshje është arritur në kohën kur Afganistani është zhytur në krizë ekonomike, pasi ndihma për zhvillim në të cilën mbështetej vendi është ndërprerë pas marrjes së pushtetit nga talebanët, vitin e kaluar.
Ministri në detyrë i Tregtisë dhe Industrisë, Haji Nooruddin Azizi, ka thënë për Reuters se marrëveshja do të zgjasë për një periudhë prove të papërcaktuar, pas së cilës palët do të nënshkruajnë një marrëveshje afatgjate nëse do të ndahen të kënaqura me marrëveshjen e nënshkruar aktualisht.
Ai dha detaje mbi çmimet ose mënyrat e pagesës, por tha se Rusia ka rënë dakord për zbritje në tregjet globale për mallrat që do të dërgoheshin në Afganistan me rrugë dhe hekurudha.
Azizi shtoi se Rusia i ka ofruar administratës së talebanëve një zbritje të konsiderueshme në krahasim me çmimet mesatare globale të mallrave.
Rusia është goditur rëndë nga sanksionet perëndimore të vendosura pas pushtimit të Ukrainës.
Masat e vendosura nga Perëndimi e kanë detyruar atë të shtyjë eksportet në vendet aziatike, veçanërisht në Kinë dhe Indi për të mbështetur ekonominë.
© KOHA.
