Disa banorë të Sarajevës ishin të dëshpëruar pas zgjedhjeve të fundjavës, me shumë dyshime se rezultatet do të çonin në ndryshime domethënëse.
Rezultatet e para preliminare, të lëshuara nga komisioni qendror zgjedhor i Bosnjës treguan pretendentët e prirë për bashkëpunim Denis Beqiroviq dhe Zeljko Komshiq në rrugën për të fituar vendet përkatëse boshnjake dhe kroate në presidencën trepalëshe. Megjithatë, reformistëve ka të ngjarë t’u bashkohet Zhelka Cvijanoviq, nga partia më e fuqishme serbe e Bosnjës – SNSD-ja secesioniste dhe pro-ruse.
Zgjedhjet përfshinin gara për tre anëtarët e presidencës së përbashkët multietnike të Bosnjës, presidentin e njërës prej dy pjesëve të saj shumë autonome dhe deputetë të parlamentit në nivele të ndryshme, pjesërisht të mbivendosura, të qeverisjes. Struktura institucionale e Bosnjës, e përshkruar shpesh si një nga më të komplikuarat në botë, u prezantua nga një marrëveshje paqeje e ndërmjetësuar nga SHBA-ja që i dha fund luftës në vitet 1990 midis tri grupeve kryesore etnike të saj.
Të gjitha veprimet në mbarë vendin kërkojnë konsensus nga të tri grupet etnike. Nëse rezultatet paraprake mbeten, Cvijanoviq do të marrë postin nga shefi i partisë së saj politike, Milorad Dodik, i cili zgjodhi të kandidojë për presidentin e pjesës së drejtuar nga serbët e Bosnjës në vend që të kërkojë një mandat të dytë në presidencën e përbashkët mbarëkombëtare.
© KOHA. Të gjitha të drejtat janë të rezervuara.
