Këshilltari i presidentit ukrainas, Volodymyr Zelensky, Oleksiy Arestovych ka ofruar dorëheqjen e tij pasi deklaroi se një raketë ruse që goditi një ndërtesë në Dnipro, duke vrarë 44 persona, ishte hedhur poshtë nga Kievi.
Arestovych kërkoi falje dhe tha se kishte bërë një "gabim themelor", raportoi BBC-ja të martën.
Deklarata e tij shkaktoi zemërim të gjerë në vend dhe u përdor nga zyrtarët rusë për të fajësuar Ukrainën.
Këshilltari është një figurë e njohur për shkak të përditësimeve të tij në YouTube, të shikuar nga miliona njerëz.
Presidenti Zelensky nuk ka komentuar ende vendimin e Arestovych për të dhënë dorëheqjen.
Disa orë pasi sulmi raketor i së shtunës goditi një ndërtesë apartamentesh në Dnipro, Arestovych fillimisht tha se dukej se raketa ruse kishte rënë mbi ndërtesën pasi u rrëzua nga mbrojtja ajrore ukrainase. Mirëpo Ukraina tha se ndërtesa u godit nga një raketë ruse Kh-22, të cilën ajo nuk ka aftësinë ta rrëzojë.
Ukrainasit reaguan me zemërim ndaj komenteve të Arestovych, me disa që e akuzuan atë për forcimin e pozitës së propaganduesve rusë. Disa deputetë ukrainas nënshkruan një peticion që kërkon që Arestovych të shkarkohet si zyrtar i Qeverisë.
Ai më vonë postoi një letër duke kërkuar dorëheqjen e tij dhe tha se kishte bërë një "gabim thelbësor".
“U kërkoj ndjesë të sinqertë viktimave dhe të afërmve të tyre, banorëve të Dnipro dhe të gjithë atyre që u lënduan thellë nga versioni im i gabuar para kohe i arsyes së sulmit me raketa ruse në një ndërtesë banimi”, shkroi ai në një postim më të gjatë në Telegram.
© KOHA. Të gjitha të drejtat janë të rezervuara.
