Shkon në 87 numri i të vdekurve pas shpërthimit në një xhami në Pakistan
Numri i të vdekurve është rritur në të paktën 87 persona pas një sulmi vetëvrasës në xhami, i cili kishte në shënjestër policët në provincën pakistaneze të Peshwarit.
Xhamia është brenda një zone të policisë së sigurisë së lartë dhe një hetim është duke u zhvillua për mënyrën se si sulmuesi hyri brenda.
Kryeministri i Pakistanit dhe liderë të tjerë e kanë dënuar sulmin, një nga më të këqijtë në Pakistan në vitet e fundit, shkruan BBC.
Talebanët pakistanezë kanë mohuar përfshirjen pas një pretendimi fillestar nga një prej komandantëve të tyre.
“Terroristët duan të krijojnë frikë duke vënë në shënjestër ata që kryejnë detyrën e mbrojtjes së Pakistanit”, tha kryeministri Shehbaz Sharif. Ai shpalli ditë zie kombëtare.
Të martën, ekipet e shpëtimit ishin ende duke u përpjekur për të tërhequr besimtarët e varrosur në rrënoja.
Një zëdhënës i spitalit konfirmoi se më shumë se 100 mbetën të plagosur. Ndërkohë, funeralet janë kryer për më shumë se 20 oficerë policie.
Afër 400 oficerë policie kanë qenë në zonë në atë kohë, tha më herët shefi i Policisë së Peshwarit, Muhammad Ijaz Khan për mediat lokale.
Xhamia është në një nga zonat më të kontrolluara të qytetit, e cila përfshinë selinë e Policisë dhe zyrat e inteligjencës kundër terrorizmit.
