Ushtari u gjunjëzua në dëborë, drejtoi një raketë dhe qëlloi në drejtim të trupave ruse të pozicionuara rreth një milje larg. Ai ishte vendosur në një pozicion zjarri ukrainas dhe dukej njësoj si trupat e tjera ukrainase që luftonin në jug të qytetit Bakhmut, në një nga teatrot më brutale të luftës.
Por ai dhe shokët e tij nuk janë ukrainas. Ata janë ushtarë në një njësi ushtarake ukrainase të përbërë tërësisht nga rusë, të cilët po luftojnë dhe po vrasin bashkatdhetarët e tyre, raporton “New York Times” në një shkrim të gjatë.
Ata kanë rrëmbyer armët kundër Rusisë për një sërë arsyesh: një ndjenjë zemërimi moral ndaj pushtimit të vendit të tyre, një dëshirë për të mbrojtur atdheun e tyre të adoptuar, Ukrainën, ose për shkak të një mospëlqimi të thellë të presidentit të Rusisë, Vladimir V. Putin. Dhe ata kanë fituar mjaftueshëm besim nga komandantët ukrainas për të zënë vendin e tyre mes forcave që luftojnë me egërsi ushtrinë ruse.
"Një burrë i vërtetë rus nuk përfshihet në një luftë kaq agresive, nuk do të përdhunojë fëmijë, nuk do të vrasë gra dhe të moshuar”, tha për “New York Times” një luftëtar rus me nofkën “Cezari”, duke folur për mizoritë e kryera nga ushtarët rusë që e motivuan të largohet nga vendlindja e tij Shën Petersburg dhe të luftojë për Ukrainën. “Kjo është arsyeja pse nuk pendohem. Unë bëj punën time dhe kam vrarë shumë prej tyre”.
Gati një vit pas luftës, Legjioni i Rusisë së Lirë, siç quhet njësia, ka rrokur pak vëmendje - pjesërisht për të mbrojtur ushtarët nga hakmarrja nga Rusia, por edhe për shkak të hezitimit brenda ushtrisë ukrainase për të theksuar përpjekjet e ushtarëve, vendi i origjinës i të cilëve i ka bërë kaq shumë dëm Ukrainës. Disa qindra prej tyre janë të përqendruar në zonën përreth Bakhmutit, në Ukrainën lindore, thanë zyrtarët; ata janë gjithmonë të grupuar me të tyret, por mbikëqyren nga oficerët ukrainas.
Në intervista, disa ushtarë rusë thanë se ata tashmë jetonin në Ukrainë kur forcat ruse e pushtuan vitin e kaluar dhe ndjenin një detyrim për të mbrojtur vendin e tyre të adoptuar. Të tjerë, shpesh pa përvojë ushtarake, kaluan në Ukrainë nga Rusia pas fillimit të luftës, të prekur nga një ndjenjë se pushtimi i Kremlinit ishte thellësisht i padrejtë.
"Ne nuk kemi ardhur këtu për të provuar asgjë", tha një ushtar me nofkën “Zaza”. "Ne kemi ardhur këtu për ta ndihmuar Ukrainën të arrijë tërheqjen e plotë të forcave ruse nga territori ukrainas dhe de-putinizimin e Rusisë në të ardhmen”.
Nga frika e hakmarrjes kundër të afërmve dhe vetvetes, asnjë nga ushtarët e intervistuar nuk pranoi të identifikohej me emër ose të jepte detaje specifike për biografitë e tij. Javën e kaluar, zyra e prokurorit të përgjithshëm rus ngriti një padi në gjykatën supreme të vendit për të shpallur Legjionin organizatë terroriste, raporton “New York Times”.
“Zaza”, një biond thatanik, i cili mezi duket se ka mbaruar shkollën e mesme, nuk e dha as moshën, duke thënë vetëm se ishte nën 20 vjeç. Pas pushtimit të forcave ruse, nuk mund ta mbante gojën të mbyllur. Postimet e tij të sinqerta dhe kundër luftës në mediat sociale e futën në telashe me administratën e universitetit të tij, pastaj me policinë. Kur oficerët e Shërbimit të Sigurisë së Rusisë u shfaqën në derën e tij në vjeshtë, e kuptoi se kishte ardhur koha për t'u larguar.
Përgatiti: Rexhep Maloku
© KOHA. Të gjitha të drejtat janë të rezervuara.
