Një vit më parë, lideri rus, Vladimir Putin, sulmoi Ukrainën, duke u tallur me historinë dhe sovranitetin e saj. I nisi tanket drejt Kievit për ta rrëzuar Qeverinë e zgjedhur në mënyrë demokratike të udhëhequr nga një ish-aktor komik, Volodymyr Zelenskyy. Qëllimi i tij ishte i qartë: të shtypte një herë e mirë ëndrrat e Ukrainës për t'u bashkuar me Perëndimin dhe ta detyronte të kthehej në orbitën e Rusisë së madhe, shkruan televizioni CNN.
Në atë kohë, kushdo që parashikonte se si do të shënohej përvjetori i luftës, mund të kishte menduar për një paradë ushtarake ruse dhe një vizitë të vetë Putinit te një lider kukull që ai do ta vendoste duke e kthyer përsëri nën grushtin e hekurt të Moskës.
Realiteti është shumë më ndryshe pas rezistencës heroike ukrainase të përforcuar nga armët e dërguara nga anëtarët e NATO-s.
Presidenti i Shteteve të Bashkuara, Joe Biden, shëtiti nëpër Kiev në dritën e ditës, duke vizituar një kishë historike, ndërsa sirenat e sulmit ajror dëgjoheshin derisa ai qëndroi qëndruar përkrah Zelenskyyt në sheshin e madh, të hapur dhe ikonik të qytetit, Shën Michael.
Prania e tij dërgoi një mesazh sfidues për Putinin më drejtpërdrejt dhe një shenjë të dashur vendosmërie dhe ndjeshmërie për popullin e Ukrainës. Audienca e tij përfshinte gjithashtu fuqitë evropiane në një aleancë perëndimore që Biden e ka udhëhequr dhe fuqizuar si asnjë president që nga fundi i Luftës së Ftohtë. Dhe sa herë që një komandant i përgjithshëm shfaqet kaq guximshëm në skenën botërore, bën për vete amerikanët – nga mbështetja e të cilëve varet vazhdimi i mbështetjes së jashtëzakonshme për përpjekjet luftarake të Ukrainës – dhe për kritikët e tij të zjarrtë vendas, shkruan televizioni amerikan, CNN.
Nata e errët e pushtimit
Biden qëllimisht sfidoi ndjenjën e atëhershme dhe të tanishme që ngjallte vizita e tij, pak para përvjetorit të pushtimit të Rusisë.
“Ajo natë e errët e një viti më parë, bota fjalëpërfjalshëm ishte duke u përgatitur për rënien e Kievit”, i tha Biden Zelenskyyt në konferencë shtypi rrethuar nga Yjet dhe Shiritat e flamurit amerikan dhe flamuri dallues kombëtar verdhë e blu i Ukrainës. Vetë ngjarja kishte simbolikën e vet - nuk shfaqi dy liderë të strukur në një bunker, por vazhdoi në një dhomë të zbukuruar si çdo konferencë shtypi e liderëve të tjerë në çdo kryeqytet tjetër.
“Një vit më vonë, Kievi mbahet në këmbë. Dhe Ukraina po mbahet. Demokracia po mbahet në këmbë”, deklaroi ai. "Amerikanët janë me ju dhe bota është me ju”.
Fjalëve të Bidenit mund t'u mungonte thënia e "Ich bin ein Berliner" ose "Z. Gorbaçov, shembe këtë mur”. Por vizita e Biden hyri menjëherë në histori së bashku me dy udhëtime përcaktuese në Berlinin e ndarë nga presidentët John Kennedy dhe Ronald Reagan, të cilat ishin pika ndezëse të Luftës së Ftohtë dhe secila prej të tyre dërgon imazhin e vet të vendosmërisë së SHBA-së në Kremlin.
Vizita sekrete e Bidenit, e cila përfshinte largimin e presidentit nga SHBA-ja pa paralajmërim dhe nisjen drejt një zone aktive lufte, përputhej me disa nga skenat shumëngjyrëshe që Zelenskyy – një mjeshtër i marrëdhënieve me publikun – ka përdorur për ta ruajtur mbështetjen perëndimore për popullin e tij dhe për sigurimin e miliarda dollarëve armë dhe ndihma perëndimore.
Një hap përtej Bushit, Obamës e Trumpit
Gjatë luftërave të Amerikës në Lindjen e Mesme të 20 vjetët të fundit, amerikanët u mësuan që presidentët George W. Bush, Barack Obama dhe Donald Trump të largoheshin nga Washingtoni në fund të natës dhe të dilnin në Bagdad ose Kabul për t’i vizituar trupat amerikane dhe udhëheqësit e mbështetur nga SHBA-ja. Dhe ndërsa ato udhëtime kishin masën e tyre të guximit dhe rrezikut, vizita e Bidenit shkoi një hap më tej – duke hyrë në një kryeqytet të huaj që shpesh është nën sulm ajror dhe i mungon siguria e ofruar nga garnizonet e mëdha të trupave amerikane dhe mjeteve ajrore. Sipas këshilltarit të sigurimit kombëtar të Bidenit, Jake Sullivan, SHBA-ja e informoi Rusinë për planet për të vizituar për "qëllime dekonflikti".
Bideni kishte planifikuar gjithmonë ta vizitonte Evropën këtë javë për të shënuar përvjetorin e pushtimit rus – megjithëse programi i tij publik përmendi vetëm një udhëtim në Poloninë fqinje. Por një udhëtim përtej Atlantikut të cilit i mungonte një komponent ukrainas do të ishte i pakënaqshëm duke pasur parasysh faktin që shumë liderë evropianë kanë vizituar tashmë Kievin. Megjithatë, gjurma e sigurisë e presidentit amerikan është shumë më e madhe se ajo që shoqëron ata liderë dhe pozicioni i tij si lider i Perëndimit e lë atë shumë më të ekspozuar.
Por duke mos vizituar Ukrainën, Bideni do të kishte pranuar shprehimisht se kishte disa gjëra që Putini mund t’ia pengonte– në fakt duke treguar dobësinë e SHBA-së.
Ukrainasit e kuptuan qëllimin më mirë se kushdo.
“Pika e kthesës në këtë luftë nuk do të jetë kur ne marrim një grup tjetër armësh, por kur aleanca jonë do të ndalojë së luajturi role reaktive ndaj asaj që do të bëjë Putini”, tha Kira Rudik, deputete ukrainase, për “CNN This Morning”.
"Presidenti Biden ka vënë dorën... dhe nesër Putini do të duhet të përgjigjet për atë që ndodhi sot”, tha Rudik, duke iu referuar fjalimit të Putinit.
Përktheu: Rexhep Maloku
© KOHA. Të gjitha të drejtat janë të rezervuara.
