Mediat shtetërore kineze dhe kanalet e lidhura me to, si dhe influencuesit e mediave sociale me ndjekës të shumtë, përhapin në mënyrë rutinore ide të ekzagjeruara, të rreme ose mashtruese që etiketojnë SHBA-në. Disa zyrtarë amerikanë besojnë se Kina tani po ndërmerr ose po shqyrton operacione që nuk do të kishte bërë në të kaluarën, duke adaptuar kështu taktika të lidhura me Rusinë
Premium
Mediat shtetërore kineze dhe kanalet e lidhura me to, si dhe influencuesit e mediave sociale me ndjekës të shumtë, përhapin në mënyrë rutinore ide të ekzagjeruara, të rreme ose mashtruese që etiketojnë SHBA-në. Disa zyrtarë amerikanë besojnë se Kina tani po ndërmerr ose po shqyrton operacione që nuk do të kishte bërë në të kaluarën, duke adaptuar kështu taktika të lidhura me Rusinë
Kina është parë prej kohësh nga SHBA-ja si burim i pëlleshëm i propagandës antiamerikane, por më pak agresive në operacionet e saj të ndikimit sesa Rusia, e cila ka përdorur sulme kibernetike dhe operacione të fshehta për t’i ndikuar zgjedhjet amerikane dhe për të denigruar rivalët.
Por shumë në Uashington tani mendojnë se Kina po adopton gjithnjë e më shumë taktika të lidhura me Rusinë – dhe ka shqetësime në rritje se SHBA-ja nuk po bën sa duhet për t'u kundërpërgjigjur.
Zyrtarët amerikanë dhe ekspertët e jashtëm citojnë shembuj të fundit të aktorëve të lidhur me Kinën që gjenerojnë lajme të rreme me inteligjencë artificiale dhe postojnë vëllime të mëdha postimesh denigruese në mediat sociale. Ndërsa shumë nga përpjekjet e zbuluara janë amatore, ekspertët mendojnë se ato sinjalizojnë një gatishmëri të dukshme nga Pekini për të provuar më shumë fushata ndikimi si pjesë e një përqafimi më të gjerë të operacioneve të fshehta, sipas dy personave që njohin këtë çështje, të cilët folën në kushte anonimiteti për të diskutuar çështje të ndjeshme të inteligjencës.
“Për ne, përpjekja është ajo që bie në sy”, tha një zyrtar i inteligjencës amerikane.
“Shtetet e luhatura”
Një humor gjithnjë e më pesimist në Uashington në lidhje me qëllimet e gjera politike dhe ekonomike të Pekinit dhe mundësinë e luftës mbi Tajvanin po nxit thirrjet që SHBA-ja të bëjë një përpjekje më të fortë për të kundërshtuar ndikimin kinez jashtë vendit.
Ligjvënësit dhe zyrtarët janë veçanërisht të shqetësuar për vendet që përbëjnë "Jugun Global" në Afrikë, Azi dhe Amerikën Latine, ku si SHBA-ja ashtu edhe Kina kanë interesa të mëdha ekonomike dhe politike. Shumë prej atyre vendeve kanë popullsi që mbështesin të dyja palët – atë që një zyrtar i quajti “shtete të luhatura” në betejën narrative.
"Kjo duhet të jetë një përpjekje e tërë e qeverisë", tha Raja Krishnamoorthi nga Illinoisi, i cili është demokrati më i lartë në një komitet të sapoformuar të Dhomës së Përfaqësuesve që fokusohet në Partinë Komuniste Kineze.
"PKK-ja po del nëpër botë duke folur keq për SHBA-në, duke folur keq për institucionet tona, duke folur keq për formën tonë të qeverisjes", tha Krishnamoorthi në një intervistë. “Ne duhet ta kundërshtojmë këtë, sepse në fund të fundit nuk është në interesin më të mirë të Shteteve të Bashkuara”.
Ambasada e Kinës në Uashington tha në një deklaratë se Pekini "kundërshton fabrikimin dhe shpërndarjen e informacionit të rremë" dhe fajësoi SHBA-në nga ana e saj për bërjen e mediave sociale "mjetin e saj për të manipuluar opinionin publik ndërkombëtar dhe armën e saj për të stigmatizuar dhe demonizuar vendet e tjera".
“Për këtë çështje, i takon palës amerikane të reflektojë për veten dhe të ndalojë së bërtituri ‘kapni një hajdut’”, tha zëdhënësi i Ambasadës, Liu Pengyu.
“Zëdhënësit” e Kinës
Mediat shtetërore kineze dhe kanalet e lidhura me to, si dhe influencuesit e mediave sociale me ndjekës të shumtë, përhapin në mënyrë rutinore ide të ekzagjeruara, të rreme ose mashtruese që etiketojnë SHBA-në. Në javët e fundit, Ministria e Jashtme e Kinës ka tërhequr vëmendjen për daljen e trenit nga shinat që lëshoi kimikate toksike në Ohio, si dhe pretendimet se SHBA-ja mund të ketë sabotuar tubacionet e përdorura për transportin e gazit rus.
Administrata Biden ka hedhur poshtë akuzat për tubacionet “Nord Stream” dhe ka mbrojtur përgjigjen e saj në Ohio.
Kina është parë prej kohësh si më pak e gatshme se Rusia për të ndërmarrë hapa provokues që mund të ekspozohen dhe më shumë e shqetësuar për të fajësuar publikisht. Inteligjenca amerikane gjykoi se Rusia u përpoq të mbështeste Donald Trumpin në dy palë zgjedhjet e fundit presidenciale, ndërsa Kina në vitin 2020 e mori në konsideratë, por nuk u përpoq të ndikonte në zgjedhje.
Por disa zyrtarë amerikanë besojnë se Kina tani po ndërmerr ose po shqyrton operacione që nuk do të kishte bërë në të kaluarën, sipas dy personave që njohin këtë çështje. Kjo është pjesërisht për shkak të frikës në Pekin se ata po humbasin një betejë të narrativave në shumë vende, tha një nga njerëzit.
Zyrtarët vunë në dukje shembuj publikë të identifikuar javët e fundit nga grupet që gjurmojnë dezinformimin dhe ndikimin.
Firma kërkimore “Graphika” identifikoi kohët e fundit video të krijuara nga inteligjenca artificiale që i lidhte me një operacion të ndikimit prokinez. Një video sulmoi qasjen e SHBA-së për të ndaluar dhunën me armë; një tjetër “theksoi rëndësinë e bashkëpunimit Kinë-SHBA për rimëkëmbjen e ekonomisë globale”, sipas “Graphikas”. Dhe analistët e kërcënimeve të informatave në Google thanë se ata ndërprenë më shumë se 50 mijë raste të postimeve dhe aktiviteteve të tjera vitin e kaluar të lidhura me një operacion të ndikimit pro Kinës të njohur si "Dragonbridge". (Përktheu: Forca Jashari)
