Nëntë drejtues të një prej grupeve më të vjetra të të drejtave të njeriut në Rusi, Memorial, janë vënë në shënjestër të bastisjeve në shtëpitë e tyre pas më shumë se një viti që kur organizata e tyre u mbyll nga gjykatat.
Në mesin e tyre është edhe bashkëkryetari i Memorialit, Oleg Orlov, i cili po përballet me një çështje penale për diskreditim të ushtrisë.
I themeluar në vitin 1989, Memorial synonte të kujtonte miliona njerëz të pafajshëm të persekutuar nga represioni sovjetik. Por, kjo organizatë u likuidua përpara pushtimit të plotë të Ukrainës nga Rusia.
Bastisjet u zhvilluan pasi komiteti hetues i Rusisë hapi një hetim penal kundër Memorial për "rehabilitimin e nazizmit", raportoi të martën BBC-ja.
Memoriali ka qenë nën presion politik prej vitesh dhe ai u intensifikua në vitin 2014, kur Rusia aneksoi Krimenë nga Ukraina dhe forcat pro ruse pushtuan zonat e Ukrainës lindore.
Ajo fitoi Çmimin Nobel për Paqe 2022 së bashku me Qendrën e Ukrainës për Liritë Civile dhe aktivistin bjellorus për të drejtat civile, Ales Bialiatski. Ai u dënua me 10 vjet burg këtë muaj.
Kryetari i Memorialit, Yan Rachinsky është një nga udhëheqësit e shënjestruar në bastisjet e së martës. Kur mori çmimin Nobel në Oslo dhjetorin e kaluar, ai tha se grupi ishte këshilluar nga autoritetet ruse të mos shkonte.
Mediat liberale në Rusi i përshkruan kërkimet si pjesë e një goditjeje të re nga autoritetet ndaj mospajtimit.
Oleg Orlov po hetohet sipas një ligji të futur disa ditë pasi trupat ruse hynë në Ukrainë vitin e kaluar.
Vepra e "diskreditimit të ushtrisë" është përdorur në mënyrë të përsëritur për të dhënë burgime të gjata për rusët që kanë guxuar të kritikojnë luftën, duke përfshirë figurën e opozitës Ilya Yashin dhe këshilltarin e Moskës, Alexei Gorinov.
Akuzat për "rehabilitimin e nazizmit" të ngritura në Memorial datojnë që nga viti 2021.
© KOHA.
