Shefi famëkeq i mafies siciliane, Matteo Messina Denaro, i kapur në janar pas tre dekadash në arrati, është në gjendje kome në spital dhe nuk po ushqehet më, thanë mediat të shtunën.
61-vjeçari vuante prej disa vitesh nga kanceri i zorrës së trashë. Ishte vendimi i tij për të kërkuar trajtim që çoi në arrestimin e tij pas një vizite në një klinikë në kryeqytetin sicilian Palermo.
Duke u përballur me dënime të shumta të përjetshme, ai u ndalua në një burg të sigurisë së lartë në L'Aquila, ku vazhdoi trajtimin në qelinë e tij, sipas raporteve.
Por në fillim të gushtit, Messina Denaro u transferua në repartin e të burgosurve të spitalit lokal, ku gjendja e tij është përkeqësuar ditët e fundit.
Ai tani është në një “komë të pakthyeshme”, sipas raportimeve të mediave. Mjekët kanë ndërprerë ushqimin e tij dhe ai ka kërkuar që të mos ringjallet.
Messina Denaro konsiderohet një prej udhëheqësve më të pamëshirshëm të mafias në Itali dhe akuzohet për shumë krime, përfshirë rolin e tij në vrasjen e gjyqtarit kundër-mafias Giovanni Falcone më 1992, shkruan Malta Today.
Ai është shpallur fajtor për përfshirjen në disa bombardime në Romë, Firencë dhe Milano më 1993 dhe për kidnapim dhe vrasje të një 12-vjeçari.
Messina Denaro është zhdukur në verën e vitit 1993 dhe është bërë një prej emrave më të kërkuar në Itali.
Ndonëse ka pasur spekulime se është strehuar në vende të ndryshme në botë, ai është gjetur afër vendlindjes së tij në perëndim të Sicilisë.
© KOHA. Të gjitha të drejtat janë të rezervuara.
