Kur u fikën dritat e atij që tashmë është kthyer në Amfiteatër të Teatrit Kombëtar në kryeqytet, para publikut u shfaq silueta e njërës prej balerinave të trupës. Mes lojës në errësirë e ndriçim, shpesh janë servuar të papriturat që e kanë bërë edhe më thelbësore premierën e shfaqjes “Time” me koreografi të Taulant Shehut.
Temperamenti në koreografi me lëvizje të ngadalta dhe paralele nga e gjithë trupa kanë përcjellë rrëfime te publiku nëpërmjet gjuhës së trupit. Nën ritmin e erës së furishme, tingujve të violinës, pianos e harpës kanë rrjedhur edhe lëvizjet e anëtarëve të Baletit Kombëtar të Kosovës.
Shfaqja “Time” me stil bashkëkohor ka vënë shpesh anëtarët përballë njëri-tjetrit e cila shpesh sforcohet kur krenaria shprehet. Akrobacionet shpesh e kanë matur peshën e barrës së durimit.
Sikurse “Time”është dedikim për kohën, paralelisht shpërfaq dhimbjen, forcën e dashurinë. Qëndrueshmëria emocionale e gruas e pavarësia e saj në tërësi kanë dëshmuar se nganjëherë gjuha e trupit është më e fuqishme se fjalët, siç disa herë e ka përmendur koreografi Taulant Shehu.
“Puna më e madhe është bërë që të sillnim këtë butësinë edhe të mashkullit shqiptar. Kemi punuar shumë që përmes kërcimit, përmes lëvizjeve të tregojmë si flet shpirti. Kjo ka qenë puna më e madhe që është bërë pasi është një rrymë e re e gjithë artistëve këtu dhe jam munduar shumë që sonte të fliste gjuha e trupit”.
Premiera e “Time” ka ardhur të dielën gati gjysmë viti prej kur institucioni kryesor i Baletit shënoi 50-vjetorin e tij me rikthimin në skenë të shfaqjes “Halili e Hajria” në tetor të vitit të kaluar.
Trupa e ka bërë të qartë mesazhin për publikun. Lëvizjet e trupit nganjëherë u përballojnë dinamikave të situatës, e nganjëherë shfrenohen në rrethana krejt paqësore. Kur u shmangen publikut, simbolika vjen për tërheqjen një hap më larg shoqërisë.
Drejtori i Baletit Kombëtar, Sinan Kajtazi, ka thënë se përgatitjet për premierën e shfaqjes kanë qenë procese intensive, por me atmosferë shumë të mirë mes balerinëve dhe koreografit e asistentes së tij Diletta Antonili.
“Jam tejet i lumtur që si proces, duke pasur parasysh që jemi duke kaluar në një proces të rinovimit të Teatrit, kemi arritur që prapë të kthehemi para publikut në Prishtinë pas 50-vjetorit të Baletit që e patëm në tetor të vitit të kaluar. Dua t’i përgëzoj koreografin e asistenten për një punë jashtëzakonisht intensive për të dalë një rezultat si shfaqja e baletit ‘Time’ “.
Kur hapësirën e Amfiteatrit e kaplon qetësia, çelës i komunikimit për balerinët janë lëvizjet e tyre. Balerina Aulona Nuhiu është shprehur se janë munduar të hynin në botën e koreografit dhe të kuptonin më thellë esencën e krejt shfaqjes.
“E gjithë tema e shfaqjes ka qenë me personalitetin e secilit balerin, domethënë secili ka shprehur personalitetin e tij. Interesante e kësaj shfaqjeje ka qenë që në skenë të mos shfaqemi vetëm si balerinë, por edhe si personalitete që jemi. Ecjet e fytyrat kanë qenë të një personi jashtë baletit”.
Nga Baleti Kombëtar kanë njoftuar se në tërësi gjatë vitit do të jepen 5 shfaqje premierë. Premierën e së dielës e pason ajo që për koreograf ka portugezin Daniel Cardoso, provat e së cilës parashihen të fillojnë në maj dhe premiera planifikohet të jepet më 8 qershor.
© KOHA. Të gjitha të drejtat janë të rezervuara.
