Ujësjellësi i Prizrenit i tërheq nga terreni punëtorët që bëjnë leximin e orëve shkaku i koronavirusit

Fisnik Minci 20 March 2020 19:36

Kompania rajonale e ujësjellësit “Hidroregjioni jugor” në Prizren në kuadër të zbatimit të masave për mbrojtjen e shëndetit publik kundër përhapjes së COVID-19 përkohësisht ka tërhequr lexuesit e vet të orëmatësve nga terreni.

Zyrtarët e kësaj kompanie kanë theksuar se faturimi i konsumatorëve do të bëhet sipas gjendjeve të muajit paraprak, raporton KOHA.

Gjithashtu kanë bërë thirrje që konsumatorët t’i kryejnë obligimet e tyre.

“Konform vendimeve të Qeverisë së Republikës së Kosovës dhe Ministrisë së Shëndetësisë, KRU ‘Hidroregjioni jugor’ ka marrë disa masa, ku përfshihet edhe reduktimi i stafit, që përfshin edhe lexuesit e orëmatësve. Ata janë tërhequr përkohësisht nga terreni për shkak të virusit COVID-19. Gjendja te konsumatorët do të faturohet sipas muajit paraprak”, ka thënë Nderona Kurtaj, zëdhënëse e KRU “Hidroregjioni jugor”.

Kurtaj ka shtuar se ka rënie drastike të pagesës së faturave, derisa 90 për qind e tyre janë të papaguara.

Sipas saj, arkat për pagesa në nivel rajonal janë të hapura dhe konsumatorët mund t’i bëjnë pagesat e tyre, derisa ato mund të bëhen edhe përmes transfereve bankare.

Kurtaj ka theksuar se gjendja e furnizimit me ujë është stabile në situatën aktuale.

Ajo ka shtuar se në përputhje me vendimet e Qeverisë, menaxhmenti i kompanisë ka krijuar shtabin emergjent për mbarëvajtjen e shërbimeve të furnizimit të rregullt me ujë dhe gjithashtu është bërë dezinfektimi i objekteve në nivel rajonal.

© KOHA. Të gjitha të drejtat janë të rezervuara.

Komentet

Shto koment

Të ngjashme