Akuza e opozitës në Podujevë: “Vjedhje me jaka të bardha”
Akuza të shumta për vjedhje e korrupsion kanë adresuar këshilltarët komunalë në drejtim të ekzekutivit të Podujevës kur kanë diskutuar për raportin financiar nëntëmujor janar-shtator 2020.
E kanë quajtur edhe “vjedhje me jaka të bardha” duke iu referuar zyrtarëve komunalë kur kanë shpalosur gjetjet e tyre, raporton KOHA.
Këshilltari nga radhët e Vetëvendosjes, Avni Fetahu, i cili deri pak kohë më parë kishte qenë në LDK, ka kritikuar edhe formën e raportimit të komunarëve, që sipas tij, nuk i shkruajnë detajet në këto raporte, por vetëm sipërfaqësisht.
“Kjo formë e raportimit që është sjell këtu para nesh, fillimisht tregon planifikimin e dobët, mandej edhe realizimin e dobët të buxhetit e rrjedhimisht edhe raportimin e dobët të këtij ekzekutivi. Në vazhdim po i paraqes disa raste, ku në këtë raport figuron vetëm shuma totale e shpenzimet, por jo edhe ajo çka fshihet pas saj. Rasti i shkollës ‘Elfir Behrami’ në Metehi, e sqaron me dokumente se si eliminohen operatorët që konkurrojnë nëpër tenderë”, ka thënë Avni Fetahu gjatë seancës të së premtes të Kuvendit Komunal.
Sipas tij, sivjet Komuna e Podujevës me procedurë të negociuar ka blerë autoambulancë në vlerë prej 59,840 €, ndërsa Komuna e Mamushës autoambulancë të njëjtë me të njëjtën procedurë e ka blerë prej 21,500 më e lirë.
“Në të dyja rastet e lartëcekura problem kryesor qëndron tek mungesa e publikimit të ofertës financiare (e cila parqet paramasat dhe parallogaritë) e mungesa e ofertave financiare e pasqyron korrupsionin real të organizatës buxhetore, në këtë rast të Komunës”, ka theksuar ish-shefi i Grupit të këshilltarëve të LDK-së. “Se mungesa e transparencës prodhon korrupsion, ja një shembull konkret: Mospublikimi i projektit dhe ofertave financiare për ndërtimin e rrugës ‘Zahir Pajaziti’ ku ishte i paraparë gypi i ngrohjes qendrore prej Hotel ‘Besianës’ deri tek ‘Pranvera’ nuk është vendosur gypi i ngrohjes qendrore. Si po mendoni këta qytetarë me i kthy me u ngroh me qymyr a me talla, apo me dru, ku është raporti me mjedisin dhe ambientin në këtë pikë?”.
Avni Fetahu ka thënë se kanë informata se menaxheri i projektit i ka thënë operatorit ekonomik, të cilit më vonë i është dhënë tenderi, që “për pozicionin e gypit për ngrohje të vendosë çmim të lirë, pasi ai prapë do të hiqet”.
“Për besë nëse ka ndonjë industri që është zhvilluar në këtë komunë, ajo është industria e korrupsionit në Zyrën e prokurimit të dirigjuar nga jashtë e nga brenda. Kjo është vjedhje me jaka të bardha. Në numrin rendor 76 shkruan kështu: ‘furnizime me materiale të imëta’. Ndërsa paramendoni vlera e këtyre materialeve të imëta është hiç më pak se 38.000 €. E tash ju lutem lehtë është me i harxhu mjetet pa lidhje e me u mundu me i arsyetu edhe ma pa lidhje duke i shkru nëpër kode shërbime kontraktuese tjera”, është shprehur këshilltari i VV-së. “E kur jemi te shërbimet kontraktuese tjera po ju paraqes një argument se si avullohen apo më mirë si vidhet paraja publike, e cila ju ka dhënë në mirëbesim këtyre që po i shihni këtu. Në numrin 61 nga data 25.06.2020 janë planifikuar shërbime kontraktuese tjera në vlerë prej 121.646 € dhe në një vend tjetër me numër rendor 83 gjeni një vlerë prej 2.000 € me të njëjtin emërtim gjithsej 123.646, ndërsa në raportin financiar sipas kodit ekonomik 13460 e pa numër rendor, e gjeni shumën prej 473,363.79 €. Pra afër gjysmë milioni euro të emërtuar shërbime kontraktuese tjera, të jemi të qartë këtu nuk kemi gabim teknik, por tejkalim e me këtë edhe vjedhje të buxhetit”.
Fetahu ka thënë se Komuna e Podujevës nëpërmjet këtij raporti nuk është treguar transparente dhe se, sipas tij, a jo rastësisht në të gjitha raportet e organizatave në Kosovë e rendisin të fundit për nga transparenca dhe llogaridhënia.
“Krejt në fund, të respektuar qytetarë të Komunës së Podujevës dhe ju të nderuar asambleistë jeni në dijeni se menaxheri i prokurimit bënë pazare me tenderë... Në atë video lakohet edhe emri i ish-kryetarit dhe drejtorit të Buxhetit dhe Financave, Isuf Latifi, i zyrtarëve të prokurimit dhe asnjë hap nuk ndërmerr ky shtet i kapur”.
Ndërsa, këshilltari nga radhët e PDK-së, Rafet Llapashtica, ka thënë se gjatë pandemisë, ekzekutivi komunal i ka blerë një palë dorëza 14 euro dhe një palë rroba, siç i ka quajtur ai “të llastikut” 28 euro.
“E të dyja bashkë 5 euro i merr ku të duash me pakicë. Për mirëmbajtje dhe servisim të automjeteve në vitin 2019 i keni shpenzuar 17,122 euro, ndërsa sivjet 17,467 euro. D.m.th. automjetet ajnë prishur në të njëjtin vend sikur vjet. Për vendime të gjykatave i keni shpenzuar 80,000 euro, 5 mijë euro shpenzime telefonike, ndërsa në pandemi komuna ka punuar me staf emergjent”, është shprehur ai.
E bashkëpartiaku i tij, Bashkim Syla, ka ngritur dyshime për suficit të buxhetit edhe sivjet.
“Te tabelat e shpenzimeve, kodi shërbime kontraktuese, janë shpenzuar 473,363€, ndërsa në vitin 2019 janë 279,439€ ose 75% më shumë! Te kodi ‘Lëndë djegëse’ dru 102,544€, kurse vitin e kaluar 51,174€. Te sheshi dhe hapësirat tjera publike janë prezantuar 526,492€, te tabela e pagesave firmës ‘Konstruktori’ i janë paguar 380,280€, cilat hapësira tjera janë rregulluar për 146,212€? Në fund te kodi 21200 ‘Subvencione për entitete jopublike’ i keni shpërndarë në 4 rubrika, shuma totale është 519,877€, në vitin 2019 janë shpenzuar 106,380 € diferenca është për 413,493€”, ka thënë ai.
Vërejtje ka pasur edhe nga këshilltarë tjerë komunalë, ndërsa të vetmit që e kanë përkrah kanë qenë ata të partisë në pushtet LDK. Ndërsa, drejtori për Buxhet dhe Financa, Isuf Latifi, i ka treguar shpenzimet që janë bërë deri tash, të ndarë sipas kodeve.
