Ministria e Zhvillimit Rajonal do të ndajë 270 mijë euro për projektin e ndërtimit të Stacionit të Autobusëve në Podujevës për këtë vit. Ky projekte që do të kushtojë më shumë se 1.1 milionë euro parashihet të përfundojë në vitin 2024 dhe bashkëfinancohet nga MZHR-ja dhe Komuna e Podujevës. Për këtë të mërkurën është nënshkruar edhe një marrëveshje bashkëpunimi ndërmjet këtyre dy institucioneve.
“Nënkryetarja e Komunës së Podujevës, Marigona Lahu, ka nënshkruar marrëveshje bashkëpunimi me ministrin e Ministrisë së Zhvillimit Rajonal, Fikrim Damka, për vazhdimin e mbështetjes Financiare për vitet 2023-2024 të projektit ‘Ndërtimi i Stacionit të Autobusëve’.
Projekti i ndërtimit të Stacionit të Autobusëve ka vlerën prej 1,165,575.47 euro, ku MZHR në vitin 2023 do të financojë në shumën prej 270,000.00 euro, ndërsa në vitin 2024 me 300,000.00 euro”, thuhet në njoftimin e Zyrës për marrëdhënie me publikun dhe informim të Komunës së Podujevës.
Sipas të njëjtit, Komuna e Podujevës nga buxheti i saj vjetor në vitin 2023 do të financojë këtë projekt me 200,000.00 euro, si dhe në vitin 2024 me 355,876.14 euro.
“Në emër të Komunës së Podujevës nënkryetarja Lahu ka falënderuar ministrin Damka për mbështetjen e ofruar për realizimin e këtij projekti të rëndësishëm për qytetarët llapjanë”, përfundon njoftimi.
KOHA ka raportuar edhe gjatë muajit nëntor të vitit të kaluar se ky stacion pritet të ndërtohet në pronën e ish-Ndërmarrjes “Fapol”, të cilën ia konteston Agjencia Kosovare e Privatizimit, edhe pse prona është e regjistruar në emër të Komunës së Podujevës. Por, Agjencia Kosovare e Privatizimit, më 31 maj 2016 kishte ushtruar padi kundër komunës me propozim për caktimin e masës se sigurisë dhe vërtetimin e pronësisë për parcelën kadastrale Nr. 1541, me sipërfaqe prej 2,00.00 ha (2 hektar), zona kadastrale Podujevë. Megjithëse kjo masë nuk ishte marrë nga sistemi i drejtësisë, çështja ka shkuar fillimisht në Gjykatën Themelore të Prishtinës e pastaj lënda ka shkuar në Dhomën e Posaçme të Gjykatës Supreme. Por, deri tash nuk ka ndonjë epilog.
Gjatë muajit nëntor, kryetari i Komunës, Shpejtim Bulliqi, në një konferencë për media bashkë me Ministrin Damka ka insistuar se Stacioni i Autobusëve do të ndërtohet në afërsi të ish-hotel “Besiana”.
“Jo nuk kemi kurrfarë problemi sa i përket pronës. Ju e dini që është vendimi i Kuvendit, prona është e komunës dhe objekti i stacionit do të realizohet aty ku është planifikua, do të thotë në afërsi të ish-hotel ‘Besiana”, kishte theksuar Bulliqi.
© KOHA. Të gjitha të drejtat janë të rezervuara.
