Drejtoresha e Arsimit në Komunën e Vitisë, Fatbardha Emini, ka njoftuar të dielën se ka dhënë dorëheqje nga ky post.
Përmes një postimi në Facebook, Emini ka thënë se arsimi si fushë nuk është prioritet i këtij vendi.
“Gjatë vitit 2022 së bashku me stafin e DKA-së e Drejtorët e shkollave, u angazhuam maksimalisht që të ofrojmë kushte më të mira, e mbështetje për nxënësit dhe mësimdhënësit, për një arsim cilësor dhe gjithëpërfshirës, për rend dhe siguri. Përkundër kësaj, ishte një vit me shumë kërkesa e me përplot sfida, pothuajse si çdo Komunë në Kosovë. Për fat të keq ende nuk është arsimi prioritet i këtij vendi”, ka shkruar ajo.
Ajo ka kritikuar politikën qendrore se nuk po e jep përkushtimin e mjaftueshëm karshi kërkesave që kanë shkollat dhe nxënësit, si dhe karshi problemeve në arsim.
“Një nga sfidat që po e përcjell arsimin në Komunën e Vitisë, e që është i pa arsyeshëm karshi dëmit që po shkakton te nxënësit ku edhe në vitin 2023, mësimi do të mbahet me 4 ndërrime në SHFMU ‘Halil Alidema' në Pozharan. Përkundër shumë kërkesave në drejtim të Ministrisë ende zvarritjet po vazhdojnë. E ndiej, të paktën obligim moral, që të mos vazhdoj në një ambient të tillë ku arsimi nuk trajtohet me prioritet”, ka shkruar më tej ajo.
