Këshilltarë komunalë të LDK-së në Podujevë e kanë kundërshtuar vendimin për të subvencionuar Kompaninë Rajonale të Mbeturinave (KRM) “Pastrimi”.
Zyrtarë të ekzekutivit komunalë kanë thënë se ky subvencionim është dakorduar nga të gjitha komunat e rajonit të Prishtinës të cilat i ka nën menaxhim “Pastrimi” që ta subvencionojnë pasi
Kompania për Menaxhimin e Deponive të Mbeturinave për shkak të borxhit ia ka mbyllur dyert.
Drejtori për Shërbime Publike, Mbrojte dhe Shpëtim, Bahri Selimi, ka theksuar se Komuna e Podujevës ka propozuar që ta subvencionojë me 20 mijë e 640 euro.
“Pas një takimi që e kemi pas si anëtarë të komisionit të aksionarëve më datën 11.01.2023 bashkërisht edhe me aksionarët e komunave tjera, të cilat janë aksionare në ndërmarrjet KRM ‘Pastrimi’ kemi marrë një vendim ta subvencionojmë këtë ndërmarrje sepse gjendja e saj edhe ekonomike edhe në të gjitha format është shumë e vështirë. Dhe si pasojë e borxheve të mëdha që ka kjo kompani, që ata thirren se i kanë të trashëguara dhe të grumbulluara kaherë, kjo kompani pothuajse është jashtë funksionimit”, u ka thënë kuvendarëve komunalë Bahri Selimi. “Na e dimë se çfarë problemi kemi me mbledhjen e mbeturinave, e dimë se në çfarë gjendje e kemi pas para një kohe kompaninë kur nuk kanë pas mundësi me i mbledh mbeturinat as nëpër ekonomi familjare. Dhe si pasojë e borxheve që ata i kanë ndaj deponisë së mbeturinave, këta kanë mbet jashtë funksioni sepse Kompania për Menaxhimin e Mbeturinave ua ka mbyllur dyert dhe këta nuk kanë kurrfarë mundësie që t’i deponojnë këto mbeturina, të cilat i mbledhin nga ekonomitë tona familjare dhe nga bizneset”.
Ai ka thënë se mënyra e ndarjes së subvencionimi është bërë në bazë të përqindjes së borxheve nëpër komuna.
“Neve si komunë renditemi e treta me borxhe, edhe pse me aksione jemi e dyta. Në shumën totale i bie që ne ta subvencionojmë këtë kompani me 10.32 për qind e që në mjete i bie 20 mijë e 640 euro. Qëllimi i këtij subvencionimi është se Kompania për Menaxhimin e Mbeturinave ua ka vënë kusht që për të deponuar mbeturina duhet të paguajnë së paku 20 për qind të borxhit. E qysh e kanë thanë ata, ky borxh është rreth 700 mijë euro e që i bie se afër 200 mijë euro ta subvencionojmë të gjitha komunat bashkë”, ka thënë ai.
Selimi ka thënë se ky subvencionim nuk po bëhet me dëshirën e tyre, por për shkak të nevojës që është.
Por, kundër këtij subvencionimi ka dalë partia opozitare LDK. Këshilltari i saj, Naim Çunaku, ka thënë se në komunën e Podujevës janë dy kompani.
“Po harrojmë se ne jemi në një sistem të ekonomisë së tregut të lirë, po harrojmë që në atë moment që të hysh dhe të subvencionosh njërën, krijon disfavor për tjetrin dhe para ligjit që të dy kompanitë duhet të ishin të barabarta. Nuk është hera e parë që po subvencionojnë një kompani të tillë. Favorizim i një kompanie do të thotë demotivim i një kompani tjetër”, ka thënë Naim Çunaku. “Nëse ne ndajmë subvencione për një kompani publike apo i bie që qytetari i Komunës së Podujevës dhe komunat tjera po paguajnë dy herë shërbimin: një herë në emër të taksës dhe një herë drejtpërdrejt që inkason komuna me një çmim që ajo e ka paraparë për me qenë pjesë e tregut. Dhe defektet e mosinkasimit apo grumbullimit të borxhit, veç një emër ka: keqmenaxhim”.
Ndërkohë, shefi i Grupit të këshilltarëve të LVV-së, Haki Rudari, edhe pse e ka përkrahur këtë propozim-vendim, ka kërkuar nga ekzekutivi që të mbikëqyret më shumë kjo kompani.
“Duhet të mbikëqyret më shumë kjo kompani sepse ka raste që nuk po e respekton orarin e mbledhjes së mbeturinave”, ka thënë ai.
Vërejtje ka pasur edhe këshilltari tjetër i LVV-së, Artrit Mulliqi.
“Kjo gjendje ka ardh për shkak të keqmenaxhimit. A ia vlen me investua ne diku ku ka keqmenaxhim apo ishte dashtë që gjithë këto resurse tona me i orientua drejt ndërmarrjes tonë?”, ka pyetur Mulliqi.
Ndërkohë, drejtori Bahri Selimi, duke iu përgjigjur këshilltarit Çunaku ka thënë se nuk kanë të drejtë të subvencionojnë kompani private.
“Njëra kompani është private e tjetra regjionale, por jemi aksionar si komunë me 7.3 për qind. E meqë është regjionale është e jona, na takon me u marrë me të. Dhe jo me atë private. Në njëfarë forme ne e subvecionojmë vetveten. Keqmenaxhim ka. Sikur të kishte pas një menaxhim më të mirë nuk ishin ardh në gjendje me kërkua subvencione”, ka theksuar ai.
© KOHA. Të gjitha të drejtat janë të rezervuara.
