Komuna e Drenasit punëson 10 mësimdhënës të gjuhës gjermane pa kualifikim
Mes dhjetë të punësuarve për gjuhë gjermane, ka që e kanë kryer gjuhën angleze, fakultetin për edukim parashkollor, por të tillë që nuk e kanë kaluar testin apo edhe që nuk gjenden fare në listën e aplikuesve në faqen e Komunës. Në këtë listë ka aplikues që kanë studiuar gjermanishten, por nuk janë pranuar. Në Komunën e Drenasit i arsyetojnë këto punësime
Shtatë persona janë punësuar në Drenas si mësimdhënës të gjuhës gjermane, me kualifikim për gjuhë angleze dhe për edukim parashkollor.
Në gusht është shpallur për herë të dytë konkursi për mësimdhënës të gjuhës gjermane në shkollat “Abedin Bujupi”, “Shotë Galica”, “Hasan Prishtina”, “Ali Gashi”, “Fehmi dhe Islam Kastrati”, “Xheladin Gashi-Plaku”, “Arif Shala”, “Fehmi Lladrovci” dhe “Gjergj Kastrioti-Skënderbeu”.
Përveç punësimeve pa kualifikim, për pozitën e mësimdhënësit për gjuhë gjermane është pranuar edhe një person pa aplikuar. Një mësimdhënëse e cila nuk figuron në listën zyrtare të aplikuesve të publikuar nga komuna e Drenasit është pranuar në punë në një shkollë fshati.
Drejtori i Arsimit në Drenas, Muhamet Gjoka, ka thënë se kanë punësuar persona me kualifikim joadekuat, pasi ka mungesë të kuadrit për lëndën e gjuhës gjermane.
“Për gjuhë gjermane kemi disa që janë adekuat, por kemi edhe mungesë të kuadrit, e në mungesë të kësaj i zëvendësojmë për një vit shkollor, sepse jemi të obliguar në bazë të Udhëzimit Administrativ që nuk mund të nënshkruajmë kontratë afatgjatë deri në përzgjedhjen e kandidatëve ashtu siç kërkohet me Udhëzimin Administrativ”, ka thënë Gjoka.
Në listën e zyrtare të aplikuesve figurojnë edhe persona që kanë studiuar gjuhën gjermane, por nuk janë pranuar.
Në dispozitat kalimtare të Udhëzimit Administrativ për normativin mbi kuadrin profesional të arsimit të përgjithshëm, lejohen që të bëhen punësime pa kualifikim adekuat vetëm kur kandidatët nuk e kanë të kryer nivelin master për atë drejtim.
“Në mungesë të kandidatëve të kualifikuar të nivelit master arsimor, sistemi katërvjeçar dhe baçelor katërvjeçar, mund të pranohen niveli baçelor trevjeçar për një vit shkollor”, thuhet në nenin 12 të Udhëzimit.
E për mësimdhënësen e cila është punësuar pa aplikuar, drejtori Gjoka ka thënë se bëhet fjalë për gabim teknik të Komunës.
“Ka qenë gabim teknik. Ne prandaj e publikojmë listën e aplikuesve dhe u japim tri ditë kohë për ankesë, kjo është edhe sugjerim nga auditori, në rast se është bërë ndonjë gabim teknik, e është harruar ndonjë kandidat. Komisioni e bën verifikimin dhe nëse ka pasur ndonjë lëshim teknik i jepet mundësia edhe atij kandidati të hyjë në test”, ka thënë Gjoka.
Kjo komunë ka angazhuar në mësimdhënie për gjuhë gjermane edhe dy kandidatë të cilët nuk e kaluan testin. Se nuk e kaluan testin e ka pranuar edhe Gjoka, i cili ka thënë se vendimin për angazhimin e tyre e mori që nxënësit të mos humbasin orët mësimore.
“Duke e marr parasysh se konkursi ka qenë i rishpallur dhe nuk kemi pasur kandidatë të tjerë, kandidatët në fjalë kanë vazhduar me një kontratë të shkurtë deri në procedurat që tashmë janë gati për hapjen e konkursit të ri”, ka thënë Gjoka.
Nxënësit në arsimin parauniversitar mësojnë gjuhën gjermane që nga klasa e gjashtë.
Profesoresha e gjuhës gjermane në Fakultetin e Filologjisë, Vjosa Sadriu- Hamiti, ka thënë se punësimi i mësimdhënëse me kualifikim joadekuat lë pasoja te fëmijët.
“Është pothuajse e pamundur, nuk ma merr mendja që mundet një profesor në gjuhën angleze apo gjuhën frënge të hyjë në një klasë ku janë mbi 30 nxënës dhe të mbajë gjermanisht”, ka thënë ajo. “Nëse një mësimdhënës që ka kryer anglishten, frëngjishten dhe e di gjermanishten te A1 as atë pjesë jo mirë, atëherë veç çka e dëmton fëmijën”, ka shtuar profesoresha në Universitetin e Prishtinës “Hasan Prishtina”.
Hamiti, e cila është edhe përpiluese e kurrikulës për gjuhë gjermane në arsimin parauniversitar, ka thënë se i gjithë procesi i mësimdhënies është paraparë që të zhvillohet në mënyrë komunikatave përmes lojërave. Prandaj, sipas saj, mësimdhënësit duhet ta studiojnë gjuhën gjermane për të pasur efekt procesi i mësimnxënies.
“Kemi kërkuar që të jenë të bazuar në lojë, pasi nxënësit orën efektive e kanë vetëm 30 minuta dhe duke pasur këtë parasysh ne kemi planifikuar që të jetë më shumë fillimi komunikativ, do të thotë komunikimi është forma kyç që me zhvillu planprogramin”, ka thënë ajo.
