Kronikë e zezë

Spitali i Pejës konfirmon arrestimin e ish-ministrit të Shëndetësisë me dyshimin për sulm seksual

Spitali i Pejës konfirmon arrestimin e ish-ministrit të Shëndetësisë me dyshimin për sulm seksual
Numan Baliq \ Foto: Facebook
14:27

Spitali i Pejës konfirmon arrestimin e ish-ministrit të Shëndetësisë me dyshimin për sulm seksual

Kirurgu në Spitalin e Përgjithshëm të Pejës, Numan Baliq është arrestuar të mërkurën rreth orës 23.00 me dyshimet se ka ngacmuar seksualisht një paciente në repartin ortopedik.

Arrestimin e ish-ministrit të Shëndetësisë, Baliqit e ka konfirmuar për KOHËN, zëdhënësi i këtij spitali, Naim Sahiti.

“Po, e konfirmoj se është arrestuar mjeku Numan Baliq. Ende nuk jemi të njoftuar zyrtarisht nga Policia, por ne si spital si të njoftohemi zyrtarisht nga Policia, do të ndërmarrim gjithat që parasheh rregullorja, përfshirë edhe suspendimin e mjekut deri në një vendim të gjykatës”, tha Sahiti.

Për arrestimin e tij, por pa dhënë informacione konkrete për identitetin e personit, ka njoftuar edhe Policia e Kosovës në raportin e saj 24 orësh.

“Është arrestuar i dyshuari mashkull nën dyshimin se i njëjti e ka sulmuar seksualisht viktimën femër. I dyshuari pas intervistimit me vendim të prokurorit është dërguar në mbajtje për 48-orë”, thuhet në njoftimin e policisë.

Në Prokurorinë Themelore të Pejës kanë konfirmuar për KOHËN arrestimin e një personi me dyshimin për sulm seksual në Spitalin e Pejës.

“Lidhur me rastin në fjalë është ndaluar një person nën dyshimin se ka kryer veprën penale sulm seksual në spitalin regjional të Pejës. Me urdhër të prokurorit është dërguar në ndalim 48-orësh, gjithashtu prokuroria në koordinim të plotë me Policinë e Kosovës janë duke ndërmarrë veprime lidhur me këtë çështje”, tha zëdhënësi i kësaj prokurorie, Shkodran Nikçi.

Kjo nuk është hera e parë që ish-ministri i Shëndetësisë, Numan Baliq, përballet me dyshime për ngacmim seksual. Edhe në shtator të vitit 2018 ai ishte arrestuar e pastaj edhe suspenduar me dyshimet se kishte ngacmuar seksualisht një praktikante në spital. Prokuroria Themelore e Pejës kishte ngritur aktakuzë ndaj tij për atë rast, por Gjykata Themelore e Pejës vitin e kaluar e kishte liruar nga akuza me arsyetimin se nuk është arritur të provohet se ka kryer vepër penale.

Pas kësaj, Baliq është kthyer serish në punë në spital, por lënda për rastin e parë ende nuk ka përfunduar, pasi ajo gjendet në Gjykatën e Apelit.

13:03

​Arrestohet ish-ministri i Shëndetësisë, Numan Baliq, me dyshimin për sulm seksual

Ish-ministri i Shëndetësisë, Numan Baliq është arrestuar nga Polica e Kosovës me dyshimin se në vendin e tij të punës ka sulmuar mbrëmë seksualisht një 23-vjeçare.

Zëdhënësi i Prokurorisë Themelore në Pejë, Shkodran Nikçi tha se rasti ka ndodhur në Spitalin e Pejës dhe se është arrestuar një person. Ai nuk ka zbuluar identitetin e tij, por KOHA merr vesh se bëhet fjalë për ish-ministrin Baliq.

“Lidhur me rastin në fjalë është ndaluar një person nën dyshimin se ka kryer veprën penale sulm seksual në spitalin regjional të Pejës. Me urdhër të prokurorit është dërguar në ndalim 48 orësh, gjithashtu Prokuroria në koordinim të plotë me Policinë e Kosovës janë duke ndërmarrë veprime lidhur me këtë çështje”, tha Nikçi.

Rasti ka ndodhur të mërkurën mbrëma. Për këtë ka njoftuar edhe Policia në raportin 24-orësh.

Ndryshe, ish-ministri Numan Baliq kohë më parë ishte liruar nga akuza për ngacmim seksual ndaj një punonjëse në spitalin ku punon.

Prokuroria Themelore e Pejës kishte ngritur aktakuzë për këtë vepër ndaj Baliqit, me çka dyshohej se nga muaji gusht i vitit 2018 në vazhdimësi e ka ngacmuar një praktikante në Spitalin Rajonal të Pejës, shkruan KP-ja.