Policia ka hequr shiritat që rrethuan objektin e Rektoratit të UP-së të martën.
Njësitë policore në orët e pasdites rrethuan vendin sipas një njoftimi nga stafi i rektoratit se kishin pranuar mesazh kërcënues për bombë.
Në oborrin e Rektoratit më vonë arriti edhe njësiti anti-bombë.
17:27
Njësiti anti-bombë mbërrin te Rektorati
Njësiti anti-bombë ka mbërritur tek objekti i Rektoratit të UP-së, pas pranimit të një e-maili anonim që në përmbajtje kishte kërcënim për shpërthim me bombë.
Ndërsa, Policia ka konfirmuar rastin, duke shtuar se ka marrë veprimet e nevojshme operative për ta menaxhuar situatën.
Njoftimi i plotë i Policisë:
“Rreth orës 16:00, është pranuar informata për dyshimet që ndërlidhen me një shpërthim të mundshëm në Rektoratin e Universitetit "Hasan Prishtina" në Prishtinë. Informacionet e para flasin se kanosja e dyshimtë ka ardhur përmes postës elektronike. Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën”.
+ 9
16:55
Kërcënim me bombë, Policia rrethon Rektoratin e UP-së
Pas pranimit të një e-maili me përmbajtje kërcënuese, me shirita të policisë është rrethuar objekti i Rektoratit të Universitetit të Prishtinës “Hasan Prishtina”, të martën pasdite.
Rektori Naser Sahiti ka konfirmuar për KOHËN se bëhet fjalë për një e-mail anonim që në përmbajtje kishte kërcënim për shpërthim me bombë.
