Mjeku përgjegjës i ndërrimit në Qendrën Emergjente në Prishtinë, Ejup Govori, ka bërë të ditur se dy gratë e plagosura në Fushë-Kosovë janë në gjendje stabile dhe jashtë rrezikut për jetë.
Nënë e bijë u plagosën me armë zjarri paraditen e së shtunës. I dyshuar është një burrë, që besohet se njihet nga viktimat. Ai ndodhet në arrati.
Govori ka thënë për KOHËN se nëna e plagosur ka marrë lëndime serioze dhe se është transferuar në sallë të operimit për t’iu nënshtruar ndërhyrjes nga kirurgu abdominal. Ka thënë se lëndimet i ka në bark dhe ekstremitetet e poshtme.
“Lëndimet janë tejet serioze në ekzaminimin me imazheri të CT-së. Është evidentuar se ka një lëndim multifragmentar të ekstremiteteve të poshtme”, ka thënë ai.
Govori ka deklaruar se dy pacientet kanë qenë me vetëdije me “parametra vitalë në kufij të normales”.
Megjithatë, ka përsëritur se lëndimet kanë qenë serioze. E bija, e lindur më 1979, ka lëndime në dy ekstremitetet e sipërme, ka bërë të ditur Govori. Ai ka thënë se viktimat kanë plagë hyrëse e dalëse.
“Të dyja ndodhen në Emergjencë. Po kryhen konsultat e kirurgut vaskular dhe ortopedit. Sipas të gjitha gjasave mendohet se edhe e bija do t’i nënshtrohet një operimi, mirëpo kjo i ka lëndimet më të lehta sesa nëna”, ka thënë Govori.
“Gjendja e tyre ka qenë stabile. Ka qenë me vetëdije, kanë qenë komunikative dhe kanë qenë plotësisht të vetëdijshme për dhënien e informative. Jashtë rrezikut për jetë kanë qenë. Do të shohim se si do të shkojë operacioni, pastaj të shohim mbas operacionit se si do të shkojë ecuria e mjekimit dhe gjendja e tyre shëndetësore. Deri tash ajo ka qenë stabile dhe me vetëdije është transferuar në sallë të operacionit”, ka thënë tutje mjeku kujdestar.
Sipas njoftimit nga Policia, rasti ka ndodhur para mesditës.
© KOHA. Të gjitha të drejtat janë të rezervuara.
