Dëshmitari mohon se ka diskutuar me të akuzuarit për vrasjen e trefishtë në Kaçanik
Në shqyrtimin gjyqësor për rastin e vrasjes së trefishtë më 2007 në Kaçanik, të mërkurën, ka dëshmuar dëshmitari me inicialet I.D. Para gjykatës, ai kryesisht është përgjigjur duke thënë se “nuk më kujtohet”. Për këtë rast po akuzohen dy persona me iniciale të njëjta, A.D., për vrasje e tentim vrasje
Në seancën e mbajtur lidhur me vrasjen e trefishtë të Kaçanikut, të mërkurën në Gjykatën Themelore në Prishtinë është dëgjuar dëshmitari me inicialet I.D. Me dy të akuzuarit për vrasje të rëndë, ka thënë se ka lidhje gjaku dhe se është dhëndër i familjes së viktimave të vrasjes së trefishtë.
Kryetari i trupit gjykues, Naser Foniqi, është interesuar nëse familjarët e afërt të të akuzuarve kanë shkuar në varrim apo për ngushëllime në familjen e viktimave pas vrasjes së 28 shtatorit të vitit 2007.
Naser Foniqi: A kanë dashur të shkojnë në të pame, në ngushëllime, a kanë tentuar? I.D – dëshmitar: Besoj që kanë qenë. Naser Foniqi: Ju besoni, por a e dini? I.D – dëshmitar: Nuk jam i sigurt, nuk e di.
Në pyetjet që ia ka shtruar përfaqësuesi i palëve të dëmtuara A.B. për vizitat në Burgun e Dubravës, ai është përgjigjur se është takuar me njërin prej të akuzuarve, por se nuk mban mend detaje.
A.B – përfaqësues i palës së dëmtuar: “A është e vërtetë se gjatë asaj vizite keni diskutuar që armët t’i asgjësoni?” I.D. – dëshmitar: “Jo, as që më kujtohet që janë përmendur armët”
Një prej të akuzuarve tha se me pyetjet që iu bënë dëshmitarit, iu kthjellua kujtesa lidhur me të.
Naser Foniqi: A të kujtohet ndokush që ka pasur kamion 8-13 ngjyrë portokalli? A.D. - i akuzuar: Po. I.D. dëshmitar: Kanë punuar tek unë. A.D. – i akuzuar: E pyeta për arsye se tha më herët se s’e di çfarë ka punuar.
Me një prej akuzuarve, dëshmitari tha se edhe takohet, por se për vrasjen e trefishtë nuk e mban mend të ketë folur me të. Në bazë të aktakuzës së 2012-tës, dy të akuzuarit me inicialet A.D. akuzohen se në bashkëkryerje me B.H. dhe Sh.Q., që tashmë janë dënuar për këtë rast, kanë kryer veprën penale “vrasje e rëndë” të personave N.B., S.B. dhe U.B., si dhe vrasje në tentativë të B.B., që u plagos, dhe S.B., që shpëtoi pa lëndime.
Prokuroria Speciale dyshon se motivi i vrasjeve me rreth 40 fishekë në fshatin Soponicë të Kaçanikut ishte xhelozia për një grua dhe borxhi i të ndjerit N.B. ndaj N.C., që u vra ditë më parë.
