Një rast i dyshimtë për kontrabandim me mallra është iniciuar të martën në fshatin Bistricë të Leposaviqit, pasi në një furgon të ndalur nga Policia janë gjetur dy dhi e 21 keca pa dokumente përcjellëse.
Siç ka bërë të ditur Policia në raportin 24-orësh të mërkurën, kombi me kafshët është dërguar në terminalin doganor në Mitrovicën e Jugut për procedim të mëtejmë.
Ka mbetur të bëhet verifikimi i dokumenteve nga Agjencia e Veterinës.
“KONTRABANDIM ME MALLËRA. Fsh. Bistricë, Leposaviq 19.03.2023-18:25. Njësiti policor ka ndaluar një automjet (furgon) me targa vendore me drejtues mashkull kosovar. Gjatë kontrollit në automjet kishte të ngarkuar kafshë (dy dhi dhe njëzetë e një keca) pa dokumente përcjellëse. Në konsultim me prokurorin kombi së bashku me kafshët dërgohet në terminalin doganor në Mitrovicë Jugu për procedim të mëtutjeshëm, dhe mbetet të bëhet verifikimi i dokumenteve nga AVUK-u”, thuhet në raportin e Policisë.
© KOHA. Të gjitha të drejtat janë të rezervuara.
