I kërkuari për kontrabandë kapet duke kryer të njëjtën vepër
Policia e Kosovës të mërkurën ka arrestuar një person i cili po kërkohej për kontrabandë në Mjak të Vitisë. Ai u arrestua gjersa u kap duke kryer po të njëjtën vepër.
Sipas njoftimit të Policisë, të mërkurën, rreth orës 07:00, Policia Kufitare kanë ndaluar një automjet transportues në Mjak të Vitisë, me drejtues dhe pasagjer, dy të dyshuar meshkuj kosovarë, ku gjatë legjitimimit të tyre ka rezultuar se i dyshuari, drejtuesi i mjetit, me iniciale I. M., viti i lindjes 1993, kishte urdhërarrest aktiv të lëshuar nga gjykata kompetente.
Është vërtetuar se edhe mjeti të cilin e drejtonte, sipas Policisë, ishte pa regjistrim valid.
“Pas veprimeve të ndërmarra është realizuar edhe një kontroll në automjet, me ç’rast janë gjetur dhe janë konfiskuar 40 thasë fara kungulli x 25 kg= 1000 kg dhe 50 pako arra të qëruara x10.5kg= 525kg, për të cilat të dyshuarit nuk posedonin dokumente përkatëse dhe se të dyashurit po ashtu kanë pranuar se malli i ngarkuar është futur përmes rrugëve ilegale nga Republika e Maqedonisë së Veriut, në Republikën e Kosovës”, thuhet në njoftim.
Me vendim të prokurorit, i dyshuari i cili kishte urdhërarrest i është dorëzuar stacionit policor përkatës për procedura të mëtejme.
Malli i konfiskuar i është dorëzuar Doganës së Kosovës, ndërsa rasti ka shkruar në procedurë të rregullt.
