Policia kërkon ndihmë për kapjen e të dyshuarit për vrasjen e djeshme në Prizren
Policia ka shpallur në kërkim të dyshuarin për vrasjen e së dielës në Lagjen Arbana të Prizrenit.
Në njoftimin e lëshuar nga PK-ja thuhet se i dyshuari me inicialet A.G, 51-vjeçar, ende nuk është arritur të lokalizohet.
“Janë njoftuar të gjitha pikat kufitare dhe stacionet policore në nivel vendi ngase i dyshuari dyshohet të jetë i armatosur dhe ndalimi i të njëjtit është me shkallë të lartë të rrezikshmërisë. Me qëllim të lokalizimit të vendqëndrimit të të dyshuarit dhe të arrestimit të tij sa më të shpejtë ,nga ana e Prokurorisë Themelore të Prizrenit lëshohet autorizim për publikimin e fotografisë së të dyshuarit”, thuhet në njoftimin e Policisë.
Më tej është kërkuar ndihma e mediave dhe qytetarëve që për çfarëdo informate për vendndodhjen e të dyshuarit të njoftojnë në stacionet policore.
