Dyshohet se vrasja në Malishevë ndodhi pas një mosmarrëveshjeje në punë
Në mëngjesin e së mërkurës ndodhi një rast i vrasjes në Banjë të Malishevës. Një person dyshohet se ka vrarë kolegun e punës dhe më pas është dorëzuar në Polici. E institucionet e drejtësisë bënë të ditur se dyshohet që vrasja ndodhi shkaku i disa mosmarrëveshjeve në punë
Plumbi i shkrepur nga arma e kolegut dyshohet se ia mori jetën një qytetari nga Suhareka, mëngjesin e së mërkurës.
Viktima me inicialet A.B. dhe i dyshuari për vrasjen, me inicialet I.Z, sipas Policisë, ishin kolegë dhe punonin si bageristë.
Në Polici njoftuan se ngjarja ndodhi rreth orës 7 të mëngjesit, teksa dorasi e la viktimën në një veturë pranë një pompe derivatesh në fshatin Banjë të Malishevës.
“Rreth orës 07:15 është raportuar se në fshatin Banjë-Malishevë, viktima mashkull, i moshës madhore, është gjetur pa shenja jete, dyshohet të jetë qëlluar me armë zjarri. Ekipi mjekësor, i cili ka dalë në vendin e ngjarjes, ka konstatuar vdekjen e tij”, ka njoftuar Policia.
Pas kryerjes së vrasjes, i dyshuari për rastin është dorëzuar vetë në Polici.
Menjëherë pas rastit, siç ka njoftuar Policia, personi i dyshuar për këtë vrasje është dorëzuar në Stacionin Policor në Malishevë.
Por, para se të mbërrinte në stacionin policor, lajmin për veprën që e kreu ua kumtoi fillimisht familjarëve.
Hysen Hoxha, kryetari i fshatit Bellanicë, theksoi se përveç aktit që e ka kryer, i dyshuari nuk ua ka treguar familjarëve edhe arsyet që çuan deri te vrasja.
“Familja e kanë pritur shumë rëndë dhe nuk kanë informacione si ka ndodhur. Ky ka ardhur te shpija dhe ka thënë që e kam bërë një vepër dhe ka shkuar. Nuk ka biseduar asgjë, as vëllai i tij nuk din asgjë, asnjë informacion as që ka pasur diçka të keqe me atë djalë”, ka thënë Hoxha.
Por në Prokurorinë e Gjakovës bënë të ditur se dyshohet që vrasja ka ndodhur pasi viktima dhe dorasi kanë pasur një mosmarrëveshje në punë.
Personi i dyshuar për rastin është vënë në mbajtje prej 48 orësh, deri në caktimin e masës së paraburgimit nga Gjykata.
Gjatë këtij viti janë shtuar rastet e vrasjeve në nivel vendi, krahasuar me vitin paraprak. Sipas statistikave të ofruara nga Policia, gjatë gjithë vitit 2022 janë evidentuar 21 vrasje, teksa vetëm gjatë muajve janar-shtator të këtij viti, janë shënuar 24 syresh.
