Kulturë

Dua Lipa zotohet për dy projekte të infrastrukturës kulturore në Prishtinë

Dua Lipa zotohet për dy projekte të infrastrukturës kulturore në Prishtinë

Një investim në amfiteatrin që gjendet në qendër të Prishtinës dhe një tjetër në fshatin Bërnicë të Prishtinës, janë lajmet që ia ka sjellë vendlindjes këngëtarja shqiptare me nam botëror Dua Lipa. Në një bisedë direkte me kryetarin e Komunës së Prishtinës, Shpend Ahmeti, Lipa, që është një prej yjeve të muzikës në botë, ka shpalosur planet e saj në raport me Kosovën. E vetizoluar në Londër, Lipa, e cila së voni ka publikuar albumin e ri “Future Nostalgia”, ka folur për rëndësinë e izolimit.

Ajo ka uruar që lehtësimi i masave në raport me pandeminë të mos sjellë ndonjë valë të re infeksionesh. Ka inkurajuar qytetarët e Kosovës që të vazhdojnë të kenë kujdes të madh. E sa i përket edicionit të sivjetmë të festivalit “Sunny Hill”, së bashku me të atin, Dukagjin Lipa, e kryetarin Ahmeti e kanë lënë mundësinë e hapur që të vendoset ditëve në vazhdim nëse do të mbahet apo jo. Por në bazë të diskutimit është lënë të kuptohet se gjasat e edicionit të tretë të festivalit nuk janë reale për këtë vit.