Kulturë

Ministrisë së Kulturës i projektohet zbritja e buxhetit për 6 milionë euro

Foto: Driton Paçarada / KOHA
 

Qeveria e Kosovës ka ardhur në përfundim se Ministrisë së Kulturës duhet t’i zvogëlohet buxheti për hiç më pak se 6 milionë euro. Këtë e ka zyrtarizuar duke miratuar Projektligjin për plotësimin dhe ndryshimin e Ligjit mbi ndarjet buxhetore për këtë vit. Buxheti u është shkurtuar projekteve kapitale në kulturë e trashëgimi kulturore. Po ashtu më pak sesa në fillim të vitit është paraparë edhe për skenën e pavarur kulturore.

Projektligji i miratuar të mërkurën në Qeveri, i cili do t’i shkojë për miratim Kuvendit të Kosovës, përcakton fiks 5 milionë e 934 mijë e 570 euro më pak për institucionin më të lartë kulturor në vend. Përderisa në fillim të vitit për MKRS-në ishin ndarë 44 milionë e 176 mijë e 109 euro, Qeveria në rishikim të buxhetit ka vendosur që shuma për sivjet të jetë 38 milionë e 241 mijë e 539 euro.