Kulturë

“Don’t listen to your neighbors” i jep frymë së kaluarës muzikore

“Don’t listen to your neighbors” i jep frymë së kaluarës muzikore
“Don’t listen to your neighbors” me shokë, në studio për realizimin e albumit të dytë
 

Grupi “Don't listen to your neighbors” e sheh si mision të vet ruajtjen e trashëgimisë shpirtërore. Treshja, Adhurim Grezda, Dalvin Mamusha dhe Endrit Xërxa, këto ditë i janë përveshur punës për realizmin e albumit të tyre të dytë. Albumi është rezonim i së kaluarës muzikore nga perspektiva e së tashmes

Prishtinë, 22 janar – Treshja e grupit, “Don’t listen to your neighbors” apo në shqip “Mos i n’go kojshit”, së fundmi është “mbyllur” në studio. Anëtaret po merren me detajet e fundit të albumit të dytë. Për realizmin e tij nuk janë larguar nga gjeneza. Adhurim Grezda, Dalvin Mamusha dhe Endrit Xërxa vazhdojnë t’i mbesin besnik misionit për ruajtjen e promovimin e këngës popullore shqipe. Me projektin e ri sjellin 9 këngë e dy valle që i kanë mbledhur nga treva të ndryshme shqiptare. Ende nuk kanë vendosur për titullin e albumit, por konceptin e kanë të qartë. Për grupin, albumi është rezonim i së kaluarës muzikore nga perspektiva e së tashmes.

“Don’t listen...” u themelua në vitin 2015, në kështjellën franceze “Château de Promenois’, në lindje të Francës, 290 kilometra nga Parisi. Treshja kishte shkuar atje për një kurs dhjetëditor për teknikat e interpretimit të muzikës operistike. Adhurim Grezda në këndim dhe tambure, Dalvin Mamusha në violinë dhe Endrit Xërxa në kitarë, filluan që të interpretonin disa këngë tradicionale shqipe. Grezda tregon se nga atje u kthyen me misionin për ruajtjen e trashëgimisë shpirtërore.