Kulturë

Ministria ia huq me “drejtor artistik” të Teatrit, kërkohet anulimi i konkursit

Ministria ia huq me “drejtor artistik” të Teatrit, kërkohet anulimi i konkursit
Teatri Kombëtar i Kosovës prej shtatorit të vitit 2019 është me ushtrues detyre të udhëheqësit artistik
 

 “Në konkursin me referencë 4163/2020 specifikohet titulli i punës i konkursit që është ‘drejtor artistik’. Kjo pozitë, në bazë të legjislacionit në fuqi nuk ekziston fare. Teatri Kombëtar i Kosovës ka vetëm një drejtor, atë të përgjithshëm”, shkruhet në kërkesën e Shoqatës së Artistëve të Teatrit të Kosovës

Mungesa e kandidatëve që i kanë plotësuar kushtet ka çuar në anulimin e konkursit për drejtor të Galerisë Kombëtare të Kosovës. Por një gabim që e ka bërë Ministria e Kulturës mund të ndikojë që të anulohet edhe konkursi për “drejtor artistik” të Teatrit Kombëtar të Kosovës. Ky institucion, sipas Ligjit për teatro, nuk ka drejtor artistik por udhëheqës artistik. Kjo huqje e Ministrisë së Kulturës i ka shërbyer si vjegës Shoqatës së Artistëve të Teatrit të Kosovës (SHATK) për të kërkuar anulimin e konkursit.