Kulturë

Artistja nga Kosova zbërthen në Berlin historitë e pathëna të punëtorëve

Tri skulpturat tredimensionale në galerinë “ChertLüdde”, në ekspozitën “Here (Air Carries Poison But Yet We Breathe)”, që do të hapet sot

“Këtu (ajri është i helmuar por përsëri ne marrin frymë)” është titulli i ekspozitës personale të Doruntina Kastratit, e cila prej sot do të jetë e hapur në “ChertLüdde” të Berlinit. Nëpërmjet saj, ajo zbërthen eksploatimin e klasës punëtore nga sistemi i politikave neoliberale prej të cilave është mbërthyer bota. Për të është ekspozita më e rëndësishme deri tani

 

“Këtu (ajri është i helmuar por përsëri ne marrin frymë)” është titulli i ekspozitës personale të Doruntina Kastratit, e cila prej sot do të jetë e hapur në “ChertLüdde” të Berlinit. Nëpërmjet saj, ajo zbërthen eksploatimin e klasës punëtore nga sistemi i politikave neoliberale prej të cilave është mbërthyer bota. Për të është ekspozita më e rëndësishme deri tani

Doruntina Kastrati vazhdon që me artin e saj të nxjerrë në pah historitë e pathëna të punëtorëve të ndërtimtarisë në Kosovë. Narrativën artistike që për temë ka lëndimet e punëtorëve gjatë punës – që në jo pak raste përfundojnë me fatalitet – do ta shpalosë edhe në Gjermani, në ekspozitën e saj të parë personale në këtë vend. Artistja e re nga Kosova, të premten, do ta hapë ekspozitën “Here (Air Carries Poison But Yet We Breathe)” – “Këtu (ajri është i helmuar por përsëri ne marrin frymë)” – me të cilën synon që të vetëdijesojë nëpërmjet artit për çështjen e të drejtave të punëtorëve. Ekspozita do të qëndrojë e hapur deri më 26 qershor të këtij vitit në galerinë “ChertLüdde”.

Ekspozita “Here (Air Carries Poison But Yet We Breathe)” e Kastratit është bërë pjesë edhe e organizimit që në Berlin njihet si “Fundjava e galerisë”. Çdo vit gjatë pranverës, rreth 50 galeri në Berlin hapin ekspozita të artistëve të rinj e atyre me nam dhe mirëpresin vizitorë nga e gjithë bota në datat tashmë tradicionale, më 1 e 2 maj.