Kulturë

Sukses i trefishtë i filmave të regjisorëve shqiptarë në Varshavë

Skenë nga “Zgjoi”, “Luaneshat e kodrës” dhe “Virgjëresha shqiptare”

Se s’ka festival me nam që s’e ka një film nga regjisorë shqiptarë në program, tashmë po bëhet e rëndomtë. Por në Festivalin e Filmit në Varshavë, “Zgjoi”, “Luaneshat e kodrës” dhe “Virgjëresha shqiptare” kanë rrëmbyer nga një trofe. Për dy të parët është konfirmimi i sukseseve, e për të tretin një rrugëtim i mbarë. “Ne kemi akoma rrugë për të bërë dhe festivale të tjera që na presin”, ka thënë për KOHËN Blerta Basholli, regjisore e “Zgjoit”. “Kjo na motivon edhe më shumë që jehona e storieve tona të prekë gjithë cepat e botës”, ka thënë aktorja Rina Krasniqi, që luan Luanën, rolin kryesor në “Virgjëreshat shqiptare”

 

Se s’ka festival me nam që s’e ka një film nga regjisorë shqiptarë në program, tashmë po bëhet e rëndomtë. Por në Festivalin e Filmit në Varshavë, “Zgjoi”, “Luaneshat e kodrës” dhe “Virgjëresha shqiptare” kanë rrëmbyer nga një trofe. Për dy të parët është konfirmimi i sukseseve, e për të tretin një rrugëtim i mbarë. “Ne kemi akoma rrugë për të bërë dhe festivale të tjera që na presin”, ka thënë për KOHËN Blerta Basholli, regjisore e “Zgjoit”. “Kjo na motivon edhe më shumë që jehona e storieve tona të prekë gjithë cepat e botës”, ka thënë aktorja Rina Krasniqi, që luan Luanën, rolin kryesor në “Virgjëreshat shqiptare”

Festivalet evropiane, por jo vetëm, së fundi e kanë të vështirë përpilimin e fituesve pa pasur brenda emrin e një regjisori shqiptar. Në Poloni, në festivalin me të madh të këtij shteti evropian, në mesin e emrave të filmave fitues figurojnë: “Zgjoi”, “Luaneshat e kodrës” dhe “Virgjëresha shqiptare”. Të tre filmat, projekte të regjisorëve shqiptarë, u shpërblyen të shtunën mbrëma. E gjatë së dielës të njëjtët kanë qenë të qasshëm për t’u shikuar nga publiku i Festivalit të Filmit në Varshavë.

“Zgjoi” ka fituar çmimin kryesor të kategorinë “1-2 Competition”, që u ndahet regjisorëve për filmin e tyre të parë apo të dytë të metrazhit të gjatë. Ky është një lajm i mrekullueshëm për filmin debutues të metrazhit të gjatë të regjisores Blerta Basholli. E “Luaneshat e kodrës” nga Luana Bajrami u shpërblye me çmimin FIPRESCI, që ndahet nga Federata Ndërkombëtare e Kritikëve të Filmit për regjisorët nga Evropa Lindore. Edhe ky u ndahet regjisorëve për filmin e tyre të parë apo të dytë të metrazhit të gjatë. Bajrami, debutoi si regjisore pikërisht me këtë film. Njëkohësisht “Virgjëresha shqiptare” nga Bujar Alimani, bashkëprodhuar me Kosovën, ka fituar Çmimin Special të Jurisë në kategorinë kryesore dhe Çmimin e Jurisë Ekumenike.