Sapo vizitorët të hyjnë në këtë ekspozitë, ata mësojnë se ekziston një binjak i tyre - një digjital.
Falë teknologjisë në kohë reale, instalimet në ekspozitën "Binjakët digjitalë" shfaqin silueta dhe lëvizje të dyfishta të vizitorëve në hapësirë.
Dhjetëra censorë skanojnë vazhdimisht hapësirën përreth, duke kapur lëvizjet, madje edhe gjestet e publikut.
“Ne u përpoqëm të sfidojmë kufirin midis artit dhe teknologjisë. Shumë njerëz morën pjesë në këtë projekt dhe ne kishim një qëllim për të krijuar ‘binjakë digjitalë’ dhe për të vendosur një person në realitetin e botës digjitale”, ka thënë artisti rus Maxim Zhestkov , i cili realizoi instalacionet.
Ajo që vizitorët mund të mos e kuptojnë është se veprat e artit mund t'i “shohin” ata.
“Pra, për të shpjeguar me thjesht atë që ndodh, ka kamera që shikojnë, por nuk shikojnë me sy, ata nuk mund të shohin si ju dhe unë. Ata mund të shohin një numër pikash dhe të dërgojnë disa miliona voksele të vogla, piksel tredimensional për sekondë. Prandaj, ata mund të ndiejnë hapësirën përreth dhe të krijojnë objekte vëllimore që janë afër tyre”, ka shpjeguar Zhestkov.
Me një valëzim të dorës vizitorët mund të dërgojnë valë shumëngjyrëshe përgjatë mureve të galerisë ose të lëshojnë një vorbull kubesh digjitale.
Për organizatorët, kjo ekspozitë është vetëm fillimi.
“Arti digjital tashmë ekziston në Rusi me një bienale specifike, si pjesë e një ekspozite të muzeve dhe galerive ekzistuese. Megjithatë, vendosëm ta bëjmë atë pjesë tonën në mënyrë sistematike. Vendosëm së pari të demonstrojmë arritjet e artit mediatik global. Në dhjetor do të hapim ekspozitën e një artisti të njohur dhe gjithashtu kemi vendosur të ofrojmë mbështetje për fillestarët. Do të kemi një konkurs të hapur, një 'thirrje të hapur' nga viti i ardhshëm për disenjatorët e rinj grafikë dhe artistët e mediave digjitale”, ka thënë Olga Andreyeva, drejtuese e galerisë “Zifergauz” dhe drejtore e kompanisë “Gazprom Neft”.
Si pjesë e ekspozitës janë edhe tri instalacione nga ekspozita e përhershme, duke përfshirë një vepër arti të quajtur "Kaleidoskop", e cila imiton shatërvanët e ndriçuar të pallatit të madh “Peterhof” në Shën Petersburg. Ajo u përgjigjet hapave të vizitorëve.
Vizitorët kanë treguar se vlerësojnë risitë në art.
“Në fakt, ky është ndoshta një art i ri modern. Ndoshta njerëzit duhet të shohin dhe të zbulojnë diçka të re”, ka thënë vizitorja Irina Tsvetkova, dhe veçanërisht në aspektin teknologjik të ekspozitës.
“Unë mendoj se kjo është shumë interesante, kjo është shumë moderne dhe teknologjike. Kjo është e ardhmja. Shpresoj se gjithçka edhe më tutje do të zhvillohet me një nivel kaq të lartë”, ka thënë vizitori Alexander Petrov.
Mbi këtë vepër është edhe “The Dome”, një qiell virtual i Shën Petersburgut, moti i së cilit ndryshon shpejt.
“Kjo është shumë e pazakontë, një relaksim shumë i këndshëm, diçka krejt e re që nuk e kam parë kurrë”, ka thënë vizitorja Tatiana.
Organizatorët thonë se muzika e luajtur në galeri është realizuar nga një sistem kompjuterik i modeluar në trurin dhe sistemin nervor të njeriut dhe është e qasshme edhe në platformat e transmetimit.
