Kulturë

“Cineuropa”: A mundet “Zgjoi” të bëjë histori përsëri?

Yllka Gashi në rolin e Fahrije Hortit në filmin “Zgjoi”, kandidati i Kosovës për “Oscar”
 

Në ditën kur nisën votimet e anëtarëve të “Academy Awards”, mediumi evropian dedikuar filmit ka publikuar një artikull për “Zgjoin” nën regji të Blerta Bashollit. Ka thënë se filmi është duke marrë vëmendje përpara se të përfundojnë votimet për “Academy Award”

Gazetari dhe kritiku i filmit, Vladan Petkoviq, shkrimet e të cilit shpeshherë zënë faqet e mediumit evropian dedikuar filmit, “Cineuropa”, të enjten ka nisur një diskutim nëse “Zgjoi” nën regji të Blerta Bashollit, mund të bëjë histori, përsëri. Fillimisht ka treguar se filmi që është kandidati i Kosovës për “Oscars” fillimisht ka bërë histori kur dha premierën vitin e kaluar në “Sundace Film Festival”. U bë i pari film që fitoi tri çmimet kryesore në këtë festival prestigjioz. Mori Çmimin e publikut, atë për regji dhe të audiencës.

E pas një viti, artikulli tregon se filmi debutues i metrazhit të gjatë, i regjisores Basholli është i pari nga Kosova, shteti më i ri evropian, që ka arritur të futet në listën e ngushtë të “Academy Awards” për filmin më të mirë ndërkombëtar. Garon me 14 filma të tjerë për të qenë në mesin e pesë të nominuarve.