Kulturë

Vinçenc Gjini dhe gjenerata e tij

Vinçenc Gjini (majtas) dhe Rafet Rudi pas realizimit të veprës së Gjinit, “Hijet” në Poreç të Kroacisë, nga Kori i Filharmonisë së Kosovës më 2007
 

Në tërë veprimtarinë e tij pedagogjike, Vinçenc Gjini njihej si arsimtar serioz, tepër i saktë, profesionalisht i përgatitur, por mjaft i ashpër në vlerësim (sipas mendimit të studentëve). Por kjo kishte kuptim, për shkak se Akademisë si një institucion i ri dhe i papërvojë, institucion që bënte hapat e parë, i nevojitej një stabilitet organizativ dhe një funksionim i rregullt, e në këtë drejtim Gjini ishte një prej kontribuuesve më të mëdhenj

Vinçenc Gjini në ambientin tonë kulturor njihet si kompozitor dhe si profesor shumëvjeçar i Akademisë së Muzikës (Fakultetit të Muzikës). Është autor i një morie veprash të disa gjinive të ndryshme (vepra korale, vepra solistike, vepra orkestrale dhe vokalo-instrumentale). Ndër krijimtarinë e gjerë korale do të duhet veçuar veprat “Blegron delja”, “Hijet”, kantatat “Vatra e urtësisë”, “Ramiz o vëlla”, “Të duam liri”, solo-kënga “Letrat”, simfonjeta, disa simfoni e të tjera. Është i njohur edhe me krijimtarinë e tij në fushën e muzikës popullore dhe asaj zbavitëse (muzikës festivaleske), me të cilën merrej në fazën më të hershme të veprimtarisë krijuese.

Mbaroi studimet në Akademinë e Beogradit, Drejtimi i Pedagogjisë së Përgjithshme Muzikore (apo drejtimi teorik, siç shpesh e quajnë). Afro dy decenie më vonë ai mbaron edhe studimet e kompozicionit në Akademinë e Shkupit dhe në vitet ‘70 (tashmë si dyzetvjeçar) fillon më seriozisht t’i kushtohet kompozimit.