Bullgarët promovojnë traditën në festivalin e maskave
Festivali i maskave është mbajtur në Bullgari për të shënuar fundin e dimrit. Njerëzit u mblodhën me kostume plot ngjyra për të shmangur syrin e keq në festivalin Surva (Foto: AP)
Është shumëngjyrësh, i zhurmshëm dhe me traditë shekullore. Ky është Festivali Surva në rajonin e Pernikut, ngjarja më e vjetër e maskaradës në Bullgari. Pas një pauze trivjeçare për shkak të pandemisë, janë rikthyer interpretuesit e njohur si Kukeri.
Vallet e tyre supozohet të dëbojnë shpirtrat e këqij dhe të festojnë fundin simbolik të dimrit.
“Ky është zakoni ynë në Shrovetide. Çdo vit është në një ditë të ndryshme. Ne performojmë për shëndetin, për pjellorinë, për prosperitetin, për fatin e njerëzve. Për ta dëbuar të keqen dhe që të mbretërojë e mira. Ne jemi nga Zimnica, rajoni Jambol. Ne e kemi respektuar traditën për më shumë se 200 vjet”, ka thënë Ivan Stamov, banor i fshatit Zimnica.
Festivali ka marrë përmasa ndërkombëtare. Po marrin pjesë rreth 10 mijë kukeri nga Greqia, Rumania, Serbia, Italia, Sllovenia, Shqipëria, Maqedonia e Veriut, Mali i Zi dhe Kroacia.
Ata kërcejnë dhe tundin kambanat me zë të lartë me shpresën për të dëbuar shpirtrat e këqij. Ata gjithashtu këndojnë për të tërhequr të korra të mira, shëndet dhe pjellori.
Kostumet e tyre janë punuar nga lëkurat e kafshëve me gëzof të gjatë, si dhe me maska të zbukuruara shumë, shpesh të frikshme dhe kambana të mëdha bakri të lidhura rreth belit të tyre.
Disa maska kanë dy fytyra – një të keqe në pjesën e përparme dhe një të mirë në anën e pasme, duke simbolizuar një lidhje midis së mirës dhe së keqes.
Vallëzimi dhe tundja e ziles tradicionalisht bëhej nga burra të rinj, të pamartuar, por në ditët e sotme marrin pjesë edhe gra e fëmijë.
“Vallet kanë për qëllim të trembin të keqen, kjo është ajo që e kanë të përbashkët të gjithë interpretuesit në festival. Shfaqjet e tyre shprehin një ndjenjë magjie, misteri; në fund të fundit, e keqja është gjithmonë me ne, edhe pse ajo mbetet e padukshme. Nga ana tjetër, ka zjarrin dhe zhurmën e kambanave të bakrit që u bëjnë thirrje njerëzve të bashkohen në luftën për të mirë dhe tërheqin shumë të rinj, përfshirë fëmijët, për të marrë pjesë, megjithëse dikur kjo nuk ishte pjesë e traditave”, ka thënë Nadya Manolova, profesoreshë e historisë në Universitetin e Sofjes
Festivali folklorik u përfshi në listën e trashëgimisë kulturore jomateriale të UNESCO-s në vitin 2015.
