Aferat korruptive dhe ndikimi i tyre më vonë janë në qendër të filmit “Pikë Uji” me regjisor Robert Budinën. Ngjarje të papritura që lidhen me një vepër penale synojnë ta mbajnë shikuesin para ekranit. Në rol kryesor me Gresa Pallaskën e në ata dytësorë me Arben Bajraktaraj e Astrit Kabashin, filmi shpërfaq historinë e një nëne, zyrtare e korruptuar, e cila më pas lufton për të mbrojtur të birin adoleshent për akuzën e rëndë që i është ngritur – atë për përdhunim. Filmi pritet të finalizohet brenda këtij viti e për premierë ka target festivalet prestigjioze.
Ngjarja e filmit “Pikë uji” shtrohet në Shqipëri, atje ku Aida (Gresa Pallaska) është në mbyllje të negociatave për projektin më të madh në karrierën e saj. Si drejtoreshë e urbanistikës në bashkinë e qytezës ideon një resort turistik buzë liqenit në Pogradec, qytet ku tashmë janë vendosur shesh-xhirimet dhe planifikohet të zgjasin rreth 30 ditë. Bashkë me kryebashkiakun e qytetit, Elvisin (Adem Karaga) kanë zbatuar skemën e njëjtë korruptive prej vitesh që projekte të ngjashme t’i shfrytëzojnë për të ardhura personale. Kësisoj kanë ndërtuar pasurinë dhe imunitetin e tyre shoqëror.
Megjithatë, rrjedha e këtyre aferave përmbyset pikërisht në takim me investitorët e projektit ku Aida merr lajmin se djali i saj Marku është arrestuar. Rolin e Markut e luan 14-vjeçari rumun, Paulo Janku. Në stacion policor merr vesh se djali i saj po akuzohet për përdhunimin e shoqes së tij të klasës. Skenat e filmit do të vazhdojnë me tentativat e Aidës për të bindur të pranishmit që rastin ta dëshmojnë se Marku nuk ka qenë ai që ka kryer veprën. Fillimisht ajo mendon se djalit të saj po i vishet akuza si e motivuar politikisht kundër saj.
Astrit Kabashi futet në lojë të filmit kur karakteri i Elvisit sjell nga Tirana avokatin me nam, Luanin, i cili u premton se do ta kthejë Markun në shtëpi. “Unë jam në rolin e një avokati që mbron palën e paditur cili është djali i Aidës, rol që e luan Gresa Pallaska, kaq mund të zbuloj tash për tash”, ka thënë Kabashi shkurt për KOHË-n. Luani dështon që në seancën e parë në mbrojtjen e Markut. Dëshmitë flasin kundër tij dhe vendoset të mbahet nën arrest derisa hetimet zhvillohen.
Strategjia për ta fituar rastin e shtyn Luanin drejt përgënjeshtrimit të denoncimit nëpërmjet rrjeteve sociale e mediave. Ai e siguron Aidën se nga përvojat e tij mediat asnjëherë nuk interesohen se kush është përdhunuesi, por vetëm se kush është viktima. Aida shpejt nis të dyshojë te djali i saj, e edhe vetë ai tradhton vetveten me sjelljen e tij. Nëpërmjet dallavereve arrijnë ta largojnë prokurorin e rastit e në vend të tij, të vijë një tjetër dhe kështu prokurori i ri hedh aktakuzën dhe Marku lirohet.
Regjisori i filmit, Robert Budina, ka treguar se xhirimet e filmit kanë nisur nga 4 marsi dhe se janë duke shkuar shumë më mirë sesa pritjet e tyre. Ka njoftuar se një pjesë e mirë e shesh-xhirimeve janë vendosur pranë liqenit. “Kemi xhiruar edhe në një apartament që ishte shumë i vështirë në kuptimin e ndërtimit të skenografisë. Po shkon brenda parashikimeve, madje më shpejt se që e kishim menduar. Këtu në Pogradec ka bashkëpunim mes njerëzish e institucionesh, kështu që kemi ecur shumë mirë”, ka thënë Budina i cili ka shkruar edhe një pjesë të skenarit të filmit. Skenaristë të tjerë janë: Ajola Daja dhe Doruntina Basha me producente Sabina Kodrën.
Sipas regjisorit Budina, krejt filmi është planifikuar të përfundojë brenda vitit apo eventualisht më së largu në fillim të vitit të ardhshëm. “Sigurisht se synimet tona janë për Cannes, Berlin, Venecia, Roterdam, festivalet e kategorisë A. Deri tani nga materialet që kemi xhiruar, bashkëproducentët janë shumë të kënaqur, kjo është shumë e rëndësishme, sepse ata janë pjesë edhe e projekteve të tjera të mëdha”, është shprehur Robert Budina i cili ka vlerësuar edhe kastën e aktorëve. “Kasta kryesore përfshin Gresa Pallaskën e Arben Bajraktaraj. Kemi fatin të kemi dy aktorë si ta që po japin tonin e duhur të filmit. Tashmë gradualisht Kosova dhe Shqipëria po unifikohen në kuptimin e kulturës, kështu që për ne është fat të kemi ndihmën e tyre”.
Krijimtaria kinematografike e Robert Budinës kishte prekur edhe festivale me nam. Filmi i tij, “Agon” – i pari i tij i metrazhit të gjatë qe shfaqur në më shumë se 30 festivale mbarë botën dhe u vlerësua në disa prej tyre me çmimet për filmin më të mirë e për skenarin më të mirë.
Filmi “Pikë uji” është bashkëprodhim mes Shqipërisë, Kosovës, Rumanisë e Italisë. Është mbështetur edhe nga organizata ndërkombëtare si “MIBAC”, “Creative Europe” e “SEE”.
Bashkëproducenti Luan Kryeziu nga shtëpia filmike “Iliria Film” ka thënë se sapo ka filluar realizimi dhe xhirimet do të realizohen në Pogradec.
“Për shkak të përmbajtjes dhe vendosjes së ngjarjes, xhirimet do të realizohen vetëm në Pogradec dhe në asnjë vend tjetër”, ka thënë Kryeziu.
© KOHA. Të gjitha të drejtat janë të rezervuara.
