Korrupsioni qeveritar dhe dhuna në baza gjinore, janë listuar nga Departamenti Amerikan i Shtetit si probleme serioze në Kosovë.
Në raportin për vitin e kaluar, thuhet se nuk janë ndëshkuar disa zyrtarë, pavarësisht se janë përfshirë në afera korruptive.
“Qeveria ndonjëherë pezullonte, largonte shkelësit nga detyra ose transferonte të akuzuarit, dhe sektori i drejtësisë ndonjëherë ndërmori hapa për të ndjekur penalisht dhe ndëshkuar ata zyrtarë që kryen abuzime, shkelje dhe krime. Megjithatë, disa zyrtarë të korruptuar vazhduan të zinin poste në sektorin publik”, thuhet në raport të DASH-it.
“A jemi aty ku duam, ende jo. Mirëpo të gjitha ministritë tash teksa shënojnë këtë javë përvjetorin e dytë të qeverisjes, pra gjysmën e mandatit e bëjmë më të mirën e mundshme, por edhe vërejtjet, kritikat të cilat na jepen do t’i marrim me shumë seriozitet dhe do t’i trajtojmë me përpikëri”, tha Kurti.
Në opozitë thanë se gjetjet e Departamentit Amerikan të Shtetit janë pasojë e dështimeve të Qeverisë.
“Padyshim, si emërues i përbashkët i cili vulosë të gjitha këto gjetje që karakterizojnë Qeverinë Kurti, mbetet ambasadori Martin Berishaj, i cili, përkundër raportimeve, fakteve dhe akuzave, vazhdon të mbetet në detyrë pa dhënë asnjëherë llogari për miliona euro të shpërdoruara e të dyshimta”, tha kryetari i PDK-së, Memli Krasniqi.
“Le të mos harrojmë se premtimi kryesor i kësaj qeverie ka qenë zhbërja e korrupsionit në institucionet e Kosovës, megjithatë, raporti i miqve amerikan vërteton një gjendje të kundërt nga ky premtim”, tha anëtari i Kryesisë së LDK-së, Xhafer Tahiri.
Korrupsioni në Kosovë është përmendur si problem edhe në raportet e kaluara të përvitshme të Departamentit amerikan të Shtetit.
© KOHA. Të gjitha të drejtat janë të rezervuara.
