Kurti: I kuptojmë shqetësimet e partnerëve ndërkombëtarë, por nuk kishte opsion tjetër kushtetues
Pëlqeje KTV Video për të parë video të përzgjedhura nga KOHA
Një ditë pas zhvillimeve në veri, kryeministri Albin Kurti tha se i kupton shqetësimet e ngritura nga partnerët ndërkombëtarë, por vlerësoi se çdo opsion tjetër përpos atij që ua mundësoi hyrjen në zyre kryetarëve të rinj të komunave, do të ishte mospërmbushje e obligimeve kushtetuese të Qeverisë. Kryeministri theksoi se shkuarja e kryetarit të komunës në vendin e tij të punës do të duhej të ishte gjëja më normale e mundshme.
Kryeministri Albin Kurti u është përgjigjur reagimeve ndërkombëtare, nëpërmjet të cilave iu vu përgjegjësia atij dhe Qeverisë që drejton, për aksionin që ua mundësoi qasjen në objekte komunale kryetarëve të rinj të komunave në veri.
Departamenti Amerikan i Shtetit shprehu qëndrimin se aksioni që rezultoi me përleshje mes policisë e grupeve të serbëve, do të përcillet me pasoja në raportet ndërshtetërore.
Në një deklaratë që e postoi në rrjete sociale, kryeministri theksoi se i kupton reagimet, por shkroi se nuk kishte alternativë tjetër kushtetuese.
“Ne jemi të vetëdijshëm dhe i kuptojmë shqetësimet e ngritura nga partnerët tanë ndërkombëtarë. Por, çdo opsion tjetër, do të ishte mospërmbushje e obligimeve kushtetuese të Qeverisë sonë ndaj kryetarëve të rinj; do të ishte mospërmbushje e obligimeve dhe detyrimeve të kryetarëve të rinj ndaj qytetarëve të Republikës; dhe, do të pamundësonte ofrimin e shërbimeve bazike komunale për qytetarë”, tha Kurti.
Serbë të veriut shtinë me armë e ua vunë flakën veturave të Policisë, gjatë përpjekjes për ta penguar hyrjen e kryetarëve të rinj në objektet e komunave në Leposaviq, Zubin-Potok dhe në Zveçan.
Kryeministri tha se kryetarët do të jenë në shërbim të të gjithëve, pa dallim etnie.
“Si kryeministër i të gjithë qytetarëve, ftoj të gjithë, veçanërisht qytetarët serbë të Kosovës, që të bashkëpunojnë me kryetarët e rinj dhe kabinetet e tyre, të cilat do të jenë multietnike, multikulturore, multigjuhësore dhe multipartiake. Ata janë të zgjedhur dhe nuk janë kundër askujt, por në shërbim të të gjithëve”, tha Kurti.
Autoritetet raportuan për 5 policë të lënduar gjatë përplasjes, EULEX-i për sulm të njësiteve të tij, ndërkaq mediat serbe për dhjetëra qytetarë që kanë marrë lëndime. Serbë të maskuar sulmuan me gurë edhe ekipin e KOHËS.
Kryeministri Kurti falënderoi pjesëtarët e Policisë dhe tha se ata treguan qëndrim profesional, shtetëror dhe në mbrojtje të sundimit të ligjit.
“Ata, siç dëshmojnë çdo ditë, e dëshmuan edhe dje, që janë të gatshëm për t’i shërbyer rendit, ligjit e Republikës si profesionistë, të patrembur e dinjitozë, në afirmimin e një ambienti multietnik të sigurisë, pavarësisht kushteve të rënda që shkaktuan grupet e menaxhuara nga struktura parapolitike në atë pjesë të vendit”, tha Kurti.
Pavarësisht se kishin mbështetur zgjedhjet e parakohshme në veri, BE-ja dhe vendet e QUINT-it bënë fajtore institucionet e Kosovës për zhvillimet e së premtes dhe kërkuan sprapsje. E kryeministri Kurti ka theksuar se shkuarja e kryetarit të komunës në vendin e tij të punës do të duhej të ishte gjëja më normale e mundshme.
