Sarrazin: S’lejojmë që shanset që i ofron marrëveshja e Ohrit të shemben shkaku i ndonjë vendimi të marrë
Pëlqeje KTV Video për të parë video të përzgjedhura nga KOHA
Pas zhvillimeve të një dite më parë në veri, emisari i Gjermanisë për Ballkanin Perëndimor, Manuel Sarrazin, e ka vizituar Kosovën. Ai e quajti të pamatur e të marrë vendimin për aksionin e Policisë me të cilin iu mundësua kryetarëve të rinj qasja në objektet e komunave, e i cili rezultoi me përleshje mes policisë dhe grupeve të serbëve. Në Prishtinë, Sarrazin është pritur nga përfaqësuesit më të lartë shtetërorë dhe ka takuar edhe përfaqësues të serbëve në veri.
Emisari i Gjermanisë për Ballkanin Perëndimor, Manuel Sarrazin, ka vizituar Kosovën një ditë pas përplasjes mes Policisë dhe grupeve të serbëve në veri gjatë aksionit për t’ua mundësuar kryetarëve të rinj hyrjen në objektet e komunave.
Pas vizitës që i bëri bazës së EULEX-it në Mitrovicën Jugore, Sarrazin, tha se kjo ditë ishte e rëndë e shqetësuese për Kosovën dhe rajonin dhe e quajti të marrë vendimin e Prishtinës zyrtare për këtë aksion, pasi theksoi se me të mund të shemben marrëveshjet e arritura së fundmi me Serbinë.
“Porosia ime sot është që ne nuk do të lejojmë që këto mundësi, këto shanse që i ofron marrëveshja e Ohrit të hidhen poshtë për shkak të ndonjë vendimi të marrë”, tha Sarrazin.
Ai tha se s’mund të shërbejnë si justifikim për veprime sikur ai i së premtes, as deklarimet që mund të dëgjohen nga zyrtarët e Serbisë.
“Unë e kuptoj që për disa njerëz në Republikën e Kosovës deklaratat të cilat vijnë ose kanë ardhur javëve të kaluara nga Beogradi për sa i përket marrëveshjes së Ohrit nuk kanë qenë lehtë të kuptueshme dhe kanë qenë edhe të papranueshme. Por, secili politikan ka përgjegjësinë për veprimet e veta në rajon dhe natyrisht nëse ndjenja e ndonjërit është se gjërat nuk janë duke shkuar si duhet, atëherë ato nuk do të duhej të përkeqësohen me veprime të pamatura”, tha Sarrazin.
Sarrazin ka vizituar edhe veriun, ku ka takuar përfaqësues të komunitetit serb. Ka takuar edhe komandantin e KFOR-it dhe atë të EULEX-it.
Por, paraprakisht është pritur në Prishtinë nga përfaqësuesit më të lartë shtetërorë të Kosovës.
Pas takimeve kanë munguar deklarimet për mediat, e të dhëna përgjithësuese janë dhënë nëpërmjet njoftimeve që kanë lëshuar institucionet.
Në atë të Qeverisë theksohet se kryeministri Albin Kurti ia ka përsëritur edhe emisarit gjerman qëndrimin se nuk do të duhej të përbënte problem shkuarja në zyre, e kryetarëve të komunave.
“Kryeministri theksoi rëndësinë e respektimit të rezultateve të zgjedhjeve demokratike, duke shtuar se shkuarja e kryetarëve të komunës në zyrat e tyre të punës dhe ofrimi i shërbimeve bazike për qytetarë duhet të trajtohen si gjë normale”, thuhet nga Zyra e Kryeministrit.
E në njoftimin e Presidencës citohet presidentja Vjosa Osmani të ketë thënë se zhvillimet e fundit në veri janë të orkestruara nga struktura ilegale të Beogradit.
“Presidentja Osmani ka përsëritur se veprimet e Policisë së Kosovës ndaj strukturave ilegale e grupeve kriminale të Vuçiqit janë legjitime, në realizim të detyrave të tyre kushtetuese dhe në mbrojtje të të gjithë qytetarëve, pa dallim”, thuhet nga Presidenca.
Emisari Sarrazin nuk ka kontestuar arsyetimin e përfaqësuesve të institucioneve, por ka thënë se veprimet mbi bazën e vendosjes së sundimit të ligjit, nuk do të thotë që në nivel politik gjithmonë janë veprime të matura e të mençura.
