Situata në Leposaviq e qetë, por e brishtë, KFOR-i "blindon" objektin e Komunës
Pëlqeje KTV Video për të parë video të përzgjedhura nga KOHA
Për më shumë se 11 orë me radhë, dhjetëra protestues kanë qëndruar para objektit të Komunës së Leposaviqit. E gjithë hapësira ishte e siguruar nga ushtarë të KFOR-it, derisa kërkesa e tyre ishte largimi i kryetarit të ri, Lulzim Hetemi. Kryetari nuk u largua e njësoj edhe protestuesit, të cilët nuk përfillën kërkesat e misionit të KFOR-it në Kosovë që të shpërndahen në mënyrë të qetë.
E blinduar nga të gjitha anët prej ushtarëve amerikanë ishte objekti i Komunës së Leposaviqit këtë mëngjes.
Pjesëtarë të KFOR-it me mjete të rënda qysh para orës 6 të mëngjesit kanë zbarkuar në oborrin e kësaj komune.
Perimetri i saj është rrethuar nga pengesa të hekurta e tela më gjemba.
Pranë tyre u afruan dhjetëra protestues, të cilët për disa orë qëndruan të qetë e madje edhe komunikuan me kryesorin e ushtarëve.
Në zyrë, orët e hershme të së hënës e kanë gjetur kryetarin e Leposaviqit, Lulzim Hetemi.
Që nga e premtja e javës së shkuar dalja e Hetemit në vendin e tij të punës është e asistuar nga Njësia Speciale e Policisë së Kosovës.
Por prania e tyre, përveç dy autoblindave, para objektit nuk u vërejt gjatë ditës.
Largimi i tij nga zyra ishte kërkesa e protestuesve, por paraprakisht atij iu bashkua edhe deputeti i VV-së, Sali Zyba.
Me kalimin e kohës, qëndrimi i gjatë filloi të bëhej i mërzitshëm për protestuesit.
Nisën të gjenin metoda për t’u argëtuar, fillimisht duke kënduar këngë nacionaliste e dikur edhe duke vallëzuar.
Pasdite, disa prej protestuesve blenë dhurata për kryetarin e Leposaviqit e udhëheqësin e trupave të KFOR-it.
Dhuratat, një pako pelena e çorape për Hetemin e një tjetër për të, nuk u pranuan nga pjesëtari i KFOR-it.
Mospajtimin për refuzimin e dhuratave e shprehën duke gjuajtur ushtarët me pelena e veturat zyrtare me vezë.
Me vezë u sulmuan edhe ekipet e shumta të mediave që përcollën protestën që nga mëngjesi.
Për protestuesit thirrje për shpërndarje bëri KFOR-i dy herë radhazi, por që nuk u dëgjua nga pjesëmarrësit.
