Ministri Rashiq: Askush s’do të dalë fitues nga kjo situatë, Kurti ua do të mirën serbëve
Pëlqeje KTV Video për të parë video të përzgjedhura nga KOHA
Kryeministri Albin Kurti ua do të mirën serbëve të Kosovës, ka thënë ministri Nenad Rashiq, të hënën. Megjithatë, ka thënë se situata në veri është tensionuar për shkak të disa veprime, sipas tij, të nxitueshme. Ai shprehu gatishmërinë të ndihmojë në zgjidhjen e këtij problemi.
Ministri për Komunitete dhe Kthim, Nenad Rashiq, ka bërë thirrje për maturi, pasi nga situata në veri, sipas tij, nuk do të dalë askush fitues.
Rashiq, në një konferencë për media të hënën, ku bëri thirrje publike për subvencionim të projekteve inovative biznesore, tha se situata është delikate, por shtoi se kryeministri Albin Kurti ua do të mirën serbëve të Kosovës.
“Unë mendoj që në plan afatgjatë kryeministri Kurti ua do të mirën serbëve në veri. Mirëpo mendoj që në këtë rast, metodologjia nuk ka qenë adekuate. Unë bëj thirrje për tolerancë dhe përmbajtje. Ka ndodhur ajo që ka ndodhur dhe tani e them në mënyrë figurative që duhet t’i ngrijmë pozicionet”, ka theksuar Rashiq.
Megjithatë, ka thënë se veprimet, siç i ka cilësuar ai, të nxitueshme, e kanë shkaktuar situatën që po mbretëron në komunat veriore, ku serbët po protestojnë dhunshëm për të mos lejuar kryetarët e rinj të ushtrojnë funksionet nga ndërtesat komunale.
Nga kryetarët e rinj pret t’u shërbejnë të gjithë qytetarëve.
“Edhe një herë dua ta përsëris atë që e ka thënë kryeministri, unë pres që kryetarët e rinj të jenë në shërbim të qytetarëve. Kur e them këtë mendoj atë që 95% e qytetarëve për këtë kanë thënë që nuk ka qenë ide e mirë”, ka deklaruar Rashiq.
Ai shprehu gatishmërinë që të ndihmojë në zgjidhjen e problemit në veri.
