Një kometë e quajtur Nishimura që u zbulua një muaj më parë, mund të jetë e dukshme për syrin këtë fundjavë, duke u ofruar vështruesve një shans një herë në 437 vjet.
Topi prej shkëmbi dhe akulli, madhësia e të cilit mbetet e panjohur, është emëruar sipas astronomit japonez Hideo Nishimura i cili e vërejti i pari më 11 gusht, shkroi Guardian.
Është e rrallë që kometat ta arrijnë momentin e dukshmërisë pak pas zbulimit, ka thënë Nicolas Biver, astrofizikan. “Shumica zbulohen muaj, madje vjet para se të kalojnë afër Diellit”.
Kometa kalon nga Dielli çdo 437 vjet. Kur kometa i afrohet Diellit, nxehtësia bën që brendia e akullit të kthehet në pluhur dhe gaz, që formon një bisht të gjatë. Drita e Diellit reflekton në bishtin e saj, duke na lejuar të shohim kometat nga Toka.
